കൊച്ചി: കാലിക്കറ്റ് സര്‍വകലാശാലയിലെ അസിസ്റ്റന്റ് തസ്തികയിലേക്കുള്ള പി.എസ്.സി നിയമനം ഹൈക്കോടതി താല്‍കാലികമായി തടഞ്ഞു.
നിയമനത്തിനായി സര്‍വകലാശാല തയാറാക്കിയ റാങ്ക് ലിസ്റ്റ് നിലവിലിരിക്കെ പി.എസ്.സിയുടെ ലിസ്റ്റില്‍ നിന്ന് നിയമനം നടത്തുന്നതിനെ ചോദ്യംചെയ്ത് ഒരുകൂട്ടം ഉദ്യോഗാര്‍ഥികള്‍ നല്‍കിയ ഹരജിയിലാണ് ഹൈക്കോടതി സ്റ്റേ അനുവദിച്ചത്. കഴിഞ്ഞ ജനുവരി അവസാനവാരം നിലവില്‍വന്ന റാങ്ക് ലിസ്റ്റില്‍ നിന്ന് 300 ലേറെപ്പേരെ നിയമിച്ചിരുന്നു. പിന്നീട് ഫെബ്രുവരിയില്‍  നിയമനം പി.എസ്.സിക്കു വിട്ടുകൊണ്ട് ഉത്തരവിറങ്ങി.സര്‍വകലാശാല സിന്‍ഡിക്കേറ്റ് ഇത് അംഗീകരിക്കുകയും ചെയ്തു. സര്‍വകലാശാല തയാറാക്കിയ റാങ്ക് ലിസ്റ്റിന് രണ്ടുവര്‍ഷമാണ് കാലാവധി എന്നിരിക്കെ പി.എസ്.സി നിയമനം നടത്തുന്നത് അനുവദിക്കരുതെന്നാണ് ഹരജിക്കാരുടെ ആവശ്യം. ഹരജികളില്‍ ഇടക്കാല ഉത്തരവു നല്‍കിയ ഹൈക്കോടതി ഈ വിഷയത്തില്‍ സര്‍ക്കാരിന്റെയും സര്‍വകലാശാലയുടെയും വിശദീകരണം തേടിയിട്ടുണ്ട്.