കൊയിലാണ്ടി: തെരുവുനായ്ക്കളുടെ ആക്രമണത്തില്‍ നൂ റിലേറെ കോഴികള്‍ ചത്തു. കഴിഞ്ഞദിവസം കൊയിലാണ്ടി മുത്താമ്പി റോഡിലെ വൈദ്യരങ്ങാടിയിലെ സിനാന്‍ മന്‍സില്‍ മുനീറിന്റെ ഉടമസ്ഥതയിലുള്ള ചിക്കന്‍ സ്റ്റാളിലാണ് തെരുവുനായ്ക്കളുടെ ക്രൂരത അരങ്ങേറിയത്. പുലര്‍ച്ചെ നാലോടെ തെരുവുനായ്ക്കള്‍ കൂട്ടത്തോടെയെത്തി കടയുടെ വാതില്‍ തകര്‍ത്ത് ഇറച്ചിക്കോഴികളെ കൊന്നൊടുക്കുകയായിരുന്നു.
ശബ്ദം കേട്ട് അടുത്തുള്ള കടക്കാരന്‍ എത്തിയപ്പോള്‍ കോഴിയവശിഷ്ടങ്ങള്‍ ഛിന്നഭിന്നമായ നിലയിലാണ് കണ്ടത്. അപ്പേഴേക്കും നായ്ക്കള്‍ സ്ഥലം വിട്ടിരുന്നു. പൊലിസ് സ്ഥലത്തെത്തി പരിശോധന നടത്തി. കടയുടമ താലൂക്ക് താഹസില്‍ദാര്‍, വില്ലേജ് ഓഫിസര്‍, എന്നിവര്‍ക്ക് പരാതി നല്‍കി. സംഭവത്തില്‍ 45,000 രൂപയുടെ നഷ്ടം കണക്കാക്കുന്നു. പ്രദേശത്ത് തെരുവുനായ്ക്കളുടെ ശല്യം അസഹ്യമാണെന്ന് നാട്ടുകാര്‍ പറഞ്ഞു.