ഇരിട്ടി: ആറളം ചതിരൂര്‍ വനത്തില്‍ കാട്ടാന ചെരിഞ്ഞു. പരിപ്പ് തോട് നവജീവന്‍ കോളനിക്കടുത്ത് തോട്ടിലാണ് ആനയെ ചെരിഞ്ഞ നിലയില്‍ വനപാലകര്‍ കണ്ടെത്തിയത്. പത്തു വയസ് പ്രായമുള്ള പിടിയാനയുടെ കഴുത്തിലും പുറകുവശത്തും കൊമ്പനാനയുടെ കുത്തേറ്റ മുറിവുകളുണ്ട്. ഈ മുറിവില്‍ നിന്നു രക്തം വാര്‍ന്നാണ് ആന ചെരിഞ്ഞത്. വെള്ളിയാഴ്ച വൈകുന്നേരമാണ് ആനയെ അവശനിലയില്‍ തോട്ടില്‍ വനപാലകര്‍ കണ്ടെത്തിയത്.
വനപാലകരും ഡോക്ടറും എത്തി ആനയെ പരിശോധിച്ചെങ്കിലും ജീവന്‍ രക്ഷിക്കാനായില്ല. ഡിവിഷന്‍ ഫോറസ്റ്റ് ഓഫിസര്‍ സുന്നിയില്‍ പാമടിയുടെ നേതൃത്വത്തില്‍ വനപാലകര്‍ സ്ഥലത്തെത്തിയിരുന്നു.