ആലപ്പുഴ:സംസ്ഥാനത്തെ മഹാത്മാഗാന്ധി ദേശീയ ഗ്രാമീണ തൊഴിലുറപ്പു പദ്ധതിയില്‍ ജോലിചെയ്യുന്നവരുടെ വേതനം വര്‍ധിപ്പിക്കുന്ന കാര്യം സര്‍ക്കാര്‍ പരിഗണിക്കുമെന്ന് പൊതുമരാമത്ത് - രജിസ്‌ട്രേഷന്‍ വകുപ്പുമന്ത്രി ജി.സുധാകരന്‍. കൂലി 500 രൂപയെങ്കിലുമാക്കണമെന്നാണ് സര്‍ക്കാര്‍ ആഗ്രഹിക്കുന്നത്. എന്നാല്‍ കേന്ദ്രം തങ്ങളുടെ വിഹിതം അനുവദിക്കാന്‍ തയ്യാറാകണമെന്ന് മന്ത്രി പറഞ്ഞു.
തൊഴിലുറപ്പു പദ്ധതിയില്‍പ്പെടുത്തി അമ്പലപ്പുഴ വടക്ക് ഗ്രാമപഞ്ചായത്തില്‍ നാലാം വാര്‍ഡില്‍ നിര്‍മിച്ച ചക്കംകേരി മുതല്‍ ആന്നല വരെയുള്ള കോണ്‍ക്രീറ്റ് റോഡിന്റെ ഉദ്ഘാടനം നിര്‍വഹിച്ച് സംസാരിക്കുകയായിരുന്നു മന്ത്രി. തൊഴിലുറപ്പു തൊഴിലാളിള്‍ക്ക് നല്ലരീതിയില്‍ തൊഴില്‍ ചെയ്താല്‍ കൂടുതല്‍ മേഖലകളില്‍ സര്‍ക്കാര്‍ അവസരം നല്‍കുമെന്നും വികസനപ്രവര്‍ത്തനങ്ങളില്‍ ഇവരുടെ പങ്ക് ഉറപ്പാക്കുമെന്നും മന്ത്രി പറഞ്ഞു.
പഞ്ചായത്ത് പ്രസിഡന്റ് എ.അഫ്‌സത്ത് ആധ്യക്ഷ്യം വഹിച്ച ചടങ്ങില്‍ ബ്ലോക്ക് പഞ്ചായത്ത് പ്രസിഡന്റ് പ്രജിത്ത് കാരിക്കല്‍, വൈസ് പ്രസിഡന്റ് യു.രാജ്‌മോന്‍, ബ്ലോക്ക് പഞ്ചായത്ത് വൈസ് പ്രസിഡന്റ് രജിത, പഞ്ചായത്ത് അംഗങ്ങളായ എസ്.ഹാരിസ്, സിബിദാസ് എന്നിവര്‍ പ്രസംഗിച്ചു.