ഷാര്‍ജ: പാകിസ്താനെതിരായ മൂന്നാം ക്രിക്കറ്റ് ടെസ്റ്റില്‍ വെസ്റ്റിന്‍ഡീസ് പൊരുതുന്നു. പാകിസ്താന്റെ ഒന്നാം ഇന്നിങ്‌സ് 281 റണ്‍സില്‍ അവസാനിപ്പിച്ച അവര്‍ ഒന്നാം ഇന്നിങ്‌സില്‍ ആറു വിക്കറ്റ് നഷ്ടത്തില്‍ 244 റണ്‍സെന്ന നിലയില്‍. രണ്ടാം ദിനം കളി അവസാനിക്കുമ്പോള്‍ നാലു വിക്കറ്റുകള്‍ കൈയിലിരിക്കേ വിന്‍ഡീസ് 37 റണ്‍സ് പിറകില്‍. 95 റണ്‍സുമായി പുറത്താകാതെ നില്‍ക്കുന്ന ഓപണര്‍ ക്രെയ്ഗ് ബ്രത്‌വയ്റ്റിന്റെ മികവിലാണ് അവരുടെ പ്രതീക്ഷ. കളി നിര്‍ത്തുമ്പോള്‍ ആറു റണ്‍സുമായി നായകന്‍ ജെയ്‌സന്‍ ഹോള്‍ഡറാണ് ബ്രാത്‌വയ്റ്റിനു കൂട്ടായുള്ളത്.
മുന്‍നിര ബാറ്റ്‌സ്മാന്‍മാര്‍ തകര്‍ന്നപ്പോള്‍ മധ്യനിരയില്‍ റോസ്റ്റന്‍ ചെയ്‌സും (50), ഡോവ്‌റിച്ചും (47) ബ്രാത്‌വയ്റ്റിനു മികച്ച പിന്തുണ നല്‍കി. പാകിസ്താനായി മുഹമ്മദ് ആമിര്‍, വഹാബ് റിയാസ് എന്നിവര്‍ രണ്ടു വീതം വിക്കറ്റുകള്‍ വീഴ്ത്തി.
നേരത്തെ ടോസ് നേടി ബാറ്റിങ് തിരഞ്ഞെടുത്ത പാകിസ്താന്‍ 281 റണ്‍സില്‍ പുറത്തായി. 74 റണ്‍സെടുത്ത സമി അസ്‌ലമാണ് ടോപ് സ്‌കോറര്‍. യൂനിസ് ഖാന്‍ (51), മിസ്ബ ഉല്‍ ഹഖ് (53), സര്‍ഫ്രാസ് അഹമദ് (51) എന്നിവര്‍ ഭേദപ്പെട്ട പ്രകടനം നടത്തി.