ആലുവ: ഇന്ത്യയുടെ ബഹുസ്വരതയെ തകര്‍ക്കാനുള്ള സംഘപരിവാര്‍ ശക്തികളുടെ ഗൂഢാലോചനയുടെ ഭാഗമാണ് ഏകസിവില്‍ കോഡ് വാദമെന്ന് സമസ്ത കേരള മദ്‌റസാ മാനേജ്‌മെന്റ് അസോസിയേഷന്‍ എറണാകുളം ജില്ല കൗണ്‍സില്‍ മീറ്റ് അഭിപ്രായപ്പെട്ടു. സിവില്‍ നിയമങ്ങളുടെ ഏകീകരണം ദേശീയോദ്ഗ്രഥനം സാധ്യമാക്കുമെന്ന വാദം ശരിയല്ല.
ലോകരാഷ്ട്രങ്ങളില്‍ നെടുനായകത്വം വഹിക്കുന്ന അമേരിക്കയിലെ 50 സ്റ്റേറ്റുകളിലും വ്യത്യസ്ത സിവില്‍ ക്രിമിനല്‍ നിയമങ്ങളാണു നിലനില്‍ക്കുന്നത് എന്നും അവിടെ ദേശീയതക്കു യാതൊരു ഭീഷണി നേരിടുന്നില്ലെന്നും യോഗം ചൂണ്ടിക്കാട്ടി.
ഇസ്‌ലാമിക ശരീഅത്ത് സമ്പൂര്‍ണമാണെന്നും അതിനെ അനാവശ്യ വിവാദങ്ങളിലേക്കു വലിച്ചിഴക്കാനുള്ള മോദി സര്‍ക്കാരിന്റെ നീക്കം അപലപനീയമാണെന്നും യോഗം വിലയിരുത്തി.
എല്ലാ വിഭാഗം ജനങ്ങളെയും വിശ്വാസത്തിലെടുത്ത് അവര്‍ക്കു സാമൂഹ്യസുരക്ഷ ഉറപ്പ് വരുത്തേണ്ട ഭരണകൂടം ന്യൂനപക്ഷത്തെ ഭയത്തിന്റെ മുള്‍മുനയില്‍ നിറുത്തുന്ന പ്രവണത മതേതര രാഷ്ട്രത്തിനു ചേര്‍ന്നതല്ല.
മുത്തലാക്കിനെ സംബന്ധിച്ച് പണ്ഡിതലോകം അഭിപ്രായം വ്യക്തമാക്കിയിട്ടുള്ളതാണ്. മുസ്‌ലിം സഹോദരിമാര്‍ക്കായി മുതലക്കണ്ണീരൊഴുക്കുന്ന മോദിയും സംഘപരിവാര്‍ ശക്തികളും പുരോഗമന പ്രസ്ഥാനങ്ങളും തങ്ങളുടെ സമുദായങ്ങളിലെയും സംഘടനകളിലെയും ജീര്‍ണതക്കെതിരെയാണ് ആദ്യം പ്രതികരിക്കേണ്ടതെന്നും യോഗം വിലയിരുത്തി.
ആലുവ സെന്‍ട്രല്‍ മസ്ജിദില്‍ ചേര്‍ന്ന ജില്ലാ കൗണ്‍സില്‍ മീറ്റില്‍ പ്രസിഡന്റ് ടി.എ.ബഷീര്‍ എടത്തല അധ്യക്ഷനായിരുന്നു. ജംഇയ്യത്തുല്‍ മുഅല്ലിമീന്‍ ജില്ലാ പ്രസിഡന്റ് മുഹമ്മദ് ദാരിമി പട്ടിമറ്റം ഉദ്ഘാടനം ചെയ്തു. സംസ്ഥാന ഓര്‍ഗനൈസര്‍ ഉമര്‍ മുസ്‌ലിയാര്‍ വയനാട് മുഖ്യ പ്രഭാഷണം നടത്തി.