റാന്നി: പൊലിസിനെയും നാട്ടുകാരെയും മുള്‍മുനയില്‍ നിര്‍ത്തി റാന്നിയില്‍ യുവാവിന്റെ ആത്മഹത്യാശ്രമം. മോതിരവയല്‍ കാഞ്ഞിരത്തിങ്കല്‍ വീട്ടില്‍ വിഷ്ണു(30) ആണ് രാവിലെ പതിനൊന്നോടെ റാന്നി പാലത്തില്‍ നിന്നും പമ്പാ നദിയിലേക്കെടുത്തു ചാടിയത്. പാലത്തിന്റെ കൈവരിയില്‍ കയറി താഴേക്ക് ചാടുകയായിരുന്നു. കഴിഞ്ഞ ദിവസങ്ങളില്‍ പെയ്ത കനത്ത മഴയില്‍ നദിയില്‍ വെള്ളം കൂടുതല്‍ ആയിരുന്നു. ഒഴുക്കില്ലാത്ത ഭാഗത്തേക്കായിരുന്നു യുവാവ് ചാടിയത്.
സ്ഥലത്തെത്തിയ പൊലിസും ഫയര്‍ഫോഴ്‌സും നാട്ടുകാരും കൂടി യുവാവിനെ കരയ്‌ക്കെത്തിച്ച് റാന്നി താലൂക്കാശുപത്രിയില്‍ എത്തിച്ചു. ചേത്തയ്ക്കല്‍ റബര്‍ ബോര്‍ഡ് ജീവനക്കാരനായ വിഷ്ണു നേരത്തേ മാനസികാസ്വാസ്ഥ്യം പ്രകടിപ്പിച്ചിരുന്നതായി ബന്ധുക്കള്‍ പൊലിസിനോടു പറഞ്ഞു. റാന്നി സി.ഐ രമേഷ് കുമാര്‍, എസ്.ഐ മനോജ് കുമാര്‍, എ.എസ്.ഐ മുരളി എന്നിവരുടെ നേതൃത്വത്തില്‍ പൊലിസും ഫയര്‍ ഓഫിസര്‍ ജോസഫിന്റെ നേതൃത്വത്തില്‍ ഫയര്‍ ഫോഴ്‌സും സ്ഥലത്തെത്തി. യുവാവിനെ കൂടുതല്‍ ചികിത്സയ്ക്കായി മാനസികരോഗ്യ ആശുപത്രിയിലേക്ക് മാറ്റി.