തൊടുപുഴ:  ജില്ലാ ബാസ്‌കറ്റ്‌ബോള്‍ അസോസിയേഷന്റെ ആഭിമുഖ്യത്തിലുള്ള ജില്ലാ സീനിയര്‍ പുരുഷ- വനിതാ ബാസ്‌കറ്റ്‌ബോള്‍ ചാംപ്യന്‍ഷിപ്പിന് ഇന്ന്  കുട്ടിക്കാനം മരിയന്‍ കോളജ് ഫ്‌ളഡ്‌ലിറ്റ് ഇന്‍ഡോര്‍ സ്റ്റേഡിയത്തില്‍ തുടക്കമാവും.
ജില്ലയിലെ വിവിധ ക്ലബ്ബുകളെയും സ്ഥാപനങ്ങളേയും പ്രതിനിധീകരിച്ച് ഇരുപതോളം ടീമുകള്‍ രണ്ടു ദിവസങ്ങളിലായി നടക്കുന്ന ചാംപ്യന്‍ഷിപ്പില്‍ പങ്കെടുക്കും.  22 മുതല്‍ 27 വരെ മഞ്ചേരിയില്‍ നടക്കുന്ന സംസ്ഥാന സീനിയര്‍ ബാസ്‌കറ്റ്‌ബോള്‍ ചാംപ്യന്‍ഷിപ്പില്‍ പങ്കെടുക്കേണ്ട ഇടുക്കി പുരുഷ-വനിതാ ജില്ലാ ടീമുകളെ ഇതില്‍ നിന്ന് തെരഞ്ഞെടുക്കും.
രാവിലെ  11ന് മത്സരം ആരംഭിക്കും. 3.30ന് കുട്ടിക്കാനം മരിയന്‍ കോളജ് മാനേജര്‍ ഡോ. റൂബന്‍ ജെ താന്നിക്കല്‍ ചാംപ്യന്‍ഷിപ്പ് ഉദ്ഘാടനം ചെയ്യും. ജില്ലാ ബാസ്‌കറ്റ്‌ബോള്‍ അസോസിയേഷന്‍ പ്രസിഡന്റ് ജെന്‍സ് വി വര്‍ഗീസ് അധ്യക്ഷനാവും. ആറിന് വൈകിട്ടാണ് ഫൈനല്‍.