നിലമ്പൂര്‍: ബൈപ്പാസിന്റെ രണ്ടാം ഘട്ട നിര്‍മാണത്തിനായി ഭൂമി ഏറ്റെടുക്കുന്നതിനായുള്ള 105 കോടി രൂപയുടെ പ്രൊപ്പസല്‍ പരിഗണനയിലാണെന്നും ഭരണാനുമതിക്കായുള്ള നടപടികള്‍ സ്വീകരിച്ചു വരികയാണെന്നും പൊതുമരാമത്ത് വകുപ്പു മന്ത്രി ജി.സുധാകരന്‍ നിയമസഭയിലറിയിച്ചു. എം.എല്‍.എ പി.വി അന്‍വറിന്റെ ചോദ്യത്തിനു മറുപടിയാണ് സഭയില്‍ മന്ത്രി മണ്ഡലത്തിലെ പൊതുമരാമത്ത് പ്രവര്‍ത്തികളുടെ സ്ഥിതി അറിയിച്ചത്. ഇതിനു പുറമേ നാടുകാണി പരപ്പനങ്ങാടി റോഡ് നവീകരണത്തില്‍ അതിര്‍ത്തി നിര്‍ണയത്തിനുള്ള സര്‍വേ നടന്നു വരുന്നതായും കൂട്ടപ്പാടി പാലം നിര്‍മാണം പകുതി പ്രവൃത്തി പൂര്‍ത്തീകരിച്ചതായും അറിയിച്ചു.
പാലുണ്ട മുണ്ടേരി റോഡ് നവീകരണത്തിനായി 1220 ലക്ഷം രൂപയുടെ ഭരണാനുമതിയായതായും പൂക്കോട്ടുംപാടം ടി.കെ കോളനി റോഡിന് സാങ്കേതികാനുമതി നടപടികള്‍ സ്വീകരിച്ചു വരുന്നതായും മന്ത്രി അറിയിച്ചു. കെട്ടിട നിര്‍മാണ പ്രവൃത്തികളില്‍ ചാരങ്കുളം അങ്കണവാടി, ഗവ.മാനവേദന്‍ ഹയര്‍സെക്കന്‍ഡറി സ്‌കൂളിലെ രണ്ടു കെട്ടിടങ്ങള്‍, കുറുമ്പലങ്ങോട് എല്‍.പി.എസ്, ജി.യു.പി.എസ് പള്ളിക്കുത്ത്, ജി.എല്‍.പി.എസ് ചന്തക്കുന്ന്, കരിമ്പുഴ എല്‍.പി.എസ്, പൂക്കോട്ടും പാടം ജി.എച്ച്.എസ്.എസ് എന്നിവിടങ്ങളിലെ പ്രവൃത്തികള്‍ വിവിധ ഘട്ടങ്ങളില്‍ പുരോഗമിക്കുന്നതായും മന്ത്രി അറിയിച്ചു