സ്വന്തം ലേഖകന്‍

തലശ്ശേരി: ധര്‍മടം പൊലിസ് സ്റ്റേഷന്‍ പരിധിയിലെ ഇടത്തിലമ്പലത്തിനു സമീപം ബോംബും ആയുധങ്ങളും സൂക്ഷിക്കാനുള്ള രഹസ്യഅറ കണ്ടെത്തി. സിങ്ക് ഷീറ്റ് കൊണ്ട് നിര്‍മിച്ച വാളും കണ്ടെടുത്തു. ഇന്നലെ എസ്.ഐ നളിനാക്ഷനും സംഘവും നടത്തിയ റെയ്ഡിനിടെയാണു രഹസ്യഅറ കണ്ടെത്തിയത്. വാടക സാധനങ്ങള്‍ വിതരണം ചെയ്യുന്ന കടയ്ക്കു പിറകിലാണു പി.വി.സി പൈപ്പില്‍ തീര്‍ത്ത അറ കണ്ടെത്തിയത്. ഒരു മീറ്റര്‍ ആഴത്തില്‍ വലിയ പൈപ്പ് കുഴിച്ചാണ് ഈ രൂപത്തിലേക്ക് മാറ്റിയിരിക്കുന്നത്. ഇത് ആയുധങ്ങളും ബോംബുകളും സൂക്ഷിക്കാനാണെന്നു പൊലിസ് പറഞ്ഞു. സിങ്ക് ഷീറ്റ് കൊണ്ട് നിര്‍മിച്ച വാളും പൊലിസ് കണ്ടെടുത്തു. ആര്‍.എസ്.എസ് ശക്തി കേന്ദ്രമാണു പ്രദേശം.
ഇടത്തിലമ്പലത്തിനു സമീപം ദിവസങ്ങള്‍ക്കു മുമ്പ് അഞ്ചു ബോംബുകള്‍ പൊലിസ് കണ്ടെടുത്തിരുന്നു. ധര്‍മടം ബ്രണ്ണന്‍ കോളജ് ഗ്രൗണ്ടിനു സമീപം അടുത്തിടെ ആറു സ്റ്റീല്‍ ബോംബുകള്‍ കണ്ടെത്തിയിരുന്നു. ബോംബ് സ്‌ക്വാഡിന്റെ സഹായത്തോടെയാണു പൊലിസ് ഇന്നലെ റെയ്ഡ് നടത്തിയത്.