വാഷിങ്ടണ്‍: അമേരിക്കന്‍ പ്രസിഡന്റ് തെരഞ്ഞെടുപ്പില്‍ ബഹിരാകാശത്തു നിന്ന് ഒരാള്‍ സമ്മതിദാനം വിനിയോഗിച്ചതായി നാസ. ഷെയിന്‍ കിംബ്രോ എന്ന ബഹിരാകാശ സഞ്ചാരിയാണ് അന്താരാഷ്ട്ര ബഹിരാകാശ നിലയത്തില്‍ നിന്ന് വോട്ട് രേഖപ്പെടുത്തിയത്.

നാല് മാസത്തെ ഗവേഷണത്തിനായി ഒക്ടോബര്‍ 19 നാണ് കിംബ്രോ ബഹിരാകാശ നിലയത്തില്‍ എത്തിയത്. രണ്ട് റഷ്യന്‍ സഞ്ചാരികളും ഇയാള്‍ക്കൊപ്പമുണ്ട്.

ഹൂസ്റ്റണിലെ മിഷന്‍ കണ്‍ട്രോള്‍ സെന്ററില്‍ നിന്നും അയച്ചു കൊടുത്ത ഇലക്ട്രോണിക് ബാലറ്റിലാണ് യാത്രികന്‍ വോട്ട് ചെയ്തത്. വോട്ട് രേഖപ്പെടുത്തിയ ശേഷം ബാലറ്റ് ഇമെയില്‍ വഴിയാണ് തെരഞ്ഞെടുപ്പ് അധികൃതര്‍ക്ക് അയച്ചു കൊടുത്തത്.

ഡേവിഡ് വോള്‍ഫ് ആണ് ബഹിരാകാശത്ത് വെച്ച് വോട്ട് ചെയ്ത ആദ്യ യു.എസ് യാത്രികന്‍. റഷ്യന്‍ സ്‌പേസ് സ്റ്റേഷനായ മിറില്‍വെച്ചാണ് വോള്‍ഫ് വോട്ട് രേഖപ്പെടുത്തിയത്.