പെരുമ്പാവൂര്‍: അന്താരാഷ്ട്ര പയര്‍ വര്‍ഗ വര്‍ഷാചരണത്തിന്റെ ഭാഗമായി കഞ്ഞീം പയറും എന്ന പേരില്‍ അമ്മമാരുടെയും കുട്ടികളുടെയും ഭക്ഷ്യമേള ഒരുക്കി തണ്ടേക്കാട് ജമാഅത് എച്ച് എസ്.എസിലെ വിദ്യാര്‍ഥിക്കൂട്ടം. പുതു തലമുറയില്‍ പയര്‍വര്‍ഗ ഭക്ഷണങ്ങളോട് അപ്രിയം വര്‍ധിക്കുന്ന സാഹചര്യത്തിലാണ് ഇതിന്റെ പ്രാധാന്യം വ്യക്തമാക്കി മേള സംഘടിപ്പിച്ചത്.
വിവിധ പയര്‍ഇനങ്ങളുടെ പ്രദര്‍ശനവും സംഘടിപ്പിച്ചിരുന്നു. പയര്‍ മുഖ്യ ഇനമാക്കി 170ല്‍ പരം വിവിധ ഇനം ഭക്ഷണങ്ങള്‍ കുട്ടികള്‍ ഒരുക്കി. സ്‌കൂളിലെ എന്‍.എസ്.എസ് യൂണിറ്റിന്റെയും യു.പി.എസ്.ആര്‍.ജിയുടെയും നേതൃത്വത്തിലാണ് പരിപാടികള്‍ നടത്തിയത്.
പെരുമ്പാവൂര്‍ ബി.പി.ഒ എ.എം ആയിഷ ഭക്ഷ്യമേളയും എക്‌സിബിഷനും ഉദ്ഘാടനം ചെയ്തു. സ്‌കൂള്‍ മാനേജര്‍ എം.എം അബ്ദുല്‍ ലത്തീഫ് അദ്ധ്യക്ഷത വഹിച്ചു. പ്രധാന അധ്യാപകന്‍ വി.പി അബൂബക്കര്‍ , ബിനോയ് കെ.ജോസഫ്, കെ.എ നൗഷാദ്, പി.ലേഖ, കെ.എം ബുഷറ എന്നിവര്‍ സംസാരിച്ചു.