മുംബൈ: നിരോധിച്ച നോട്ടിനു പകരമായി പുതിയ നോട്ടുകള്‍ മാറാനെത്തിയ മോദിയുടെ മാതാവിനെക്കുറിച്ച് അഭിപ്രായം പറയാനില്ലെന്നു രാഹുല്‍ഗാന്ധി. 'ഞാന്‍ മോദിയെ പോലെയല്ല, അദ്ദേഹത്തിന്റെ അമ്മയെക്കുറിച്ചൊന്നും പറയാനില്ല.' എന്നായിരുന്നു മാധ്യമപ്രവര്‍ത്തകരുടെ ചോദ്യത്തിനു രാഹുല്‍ ഗാന്ധിയുടെ മറുപടി. കഴിഞ്ഞ ദിവസം ഗുജറാത്തിലെ ഗാന്ധിനഗറിലുള്ള ബാങ്കില്‍ ബന്ധുക്കളോടൊപ്പമാണു പ്രധാനമന്ത്രിയുടെ അമ്മ ഹീരാബെന്‍ നോട്ടുകള്‍ മാറ്റി വാങ്ങാനായി എത്തിയത്. ക്യൂവില്‍ നിന്നാണു ബെന്‍ പണംമാറിയത്.
ഇത് മാധ്യമങ്ങളില്‍ സചിത്ര വാര്‍ത്തയായിരുന്നു. കഴിഞ്ഞയാഴ്ച നോട്ടുകള്‍ മാറ്റാനായി ബാങ്കിലെത്തിയ രാഹുല്‍ ഗാന്ധിക്കെതിരേ പരാമര്‍ശവുമായി പ്രധാനമന്ത്രി രംഗത്തെത്തിയിരുന്നു. 2ജി, കല്‍ക്കരി അഴിമതി എന്നിവയില്‍ ഉള്‍പ്പെട്ടവര്‍ നാലായിരം രൂപ മാറിവാങ്ങാന്‍ ക്യൂവില്‍ നില്‍ക്കുന്നു എന്നായിരുന്നു മോദി പറഞ്ഞത്.
എന്നാല്‍ ഹീരാബെന്‍ ബാങ്കിലെത്തിയതില്‍ മോദിയെ വിമര്‍ശിച്ച് കോണ്‍ഗ്രസ് രംഗത്തെത്തിയിട്ടുണ്ട്. ഒരു മകനും 97 വയസുപ്രായമായ അമ്മയ്ക്ക് ഇങ്ങിനെ ഒരു അവസ്ഥ വരുത്താന്‍ ഇടയാക്കില്ലെന്നായിരുന്നു കോണ്‍ഗ്രസ് വക്താവ് കബില്‍ സിബലിന്റെ പരിഹാസം. സ്വന്തം അമ്മയെ നോക്കാന്‍ കഴിവില്ലാത്ത മകനില്‍ നിന്നും രാജ്യത്തെ ജനങ്ങളെ നോക്കുമെന്ന പ്രതീക്ഷ എങ്ങനെയുണ്ടാകുമെന്നായിരുന്നു കോണ്‍ഗ്രസ് നേതാവ് റാഷിദ് അല്‍വിയുടെ ചോദ്യം.