കല്‍പ്പറ്റ: ബാണാസുരസാഗര്‍ അണക്കെട്ടില്‍ മുങ്ങിത്താഴ്ന്ന യുവാവിനെ രക്ഷിക്കാന്‍ ശ്രമിക്കുന്നതിനിടെ മരിച്ച ആദിവാസി യുവാവിന്റെ കുടുംബത്തിന് സര്‍ക്കാര്‍ വാഗ്ദാനം ചെയ്ത ജോലി നല്‍കാത്തതിനെതിരെ സംസ്ഥാന മനുഷ്യാവകാശ കമ്മീഷന്‍ സ്വമേധയാ കേസെടുത്തു.
പത്രവാര്‍ത്തയുടെ അടിസ്ഥാനത്തിലാണ് നടപടി. പടിഞ്ഞാറത്തറ ബപ്പനം മലയിലെ അംബേക്കര്‍ കോളനിയില്‍ ബാബുവാണ് മരിച്ചത്. തുടര്‍ന്നാണ് ബാബുവിന്റെ കുടുംബത്തിലൊരാള്‍ക്ക് ജോലി നല്‍കുമെന്ന് സര്‍ക്കാര്‍ പ്രഖ്യാപിച്ചത്. എന്നാല്‍ ഇതുവരെ ജോലിക്കുള്ള നടപടി സ്വീകരിച്ചിരുന്നില്ല. ബാബുവിന്റെ കുടുംബത്തിന് ജോലി നല്‍കാത്തത് എന്തുകൊണ്ടാണെന്ന് സര്‍ക്കാരിനു വേണ്ടി ചീഫ് സെക്രട്ടറിയും വയനാട് ജില്ലാ കലക്ടറും മൂന്നാഴ്ചയ്ക്കകം മറുപടി ഫയല്‍ ചെയ്യണം.
ഡിസംബറില്‍ വയനാട്ടില്‍ നടക്കുന്ന സിറ്റിങില്‍ കേസ് പരിഗണിക്കും. കമ്മീഷന്‍ ആക്റ്റിങ് ചെയര്‍പേഴ്‌സന്‍ പി മോഹനദാസിന്റേതാണ് ഉത്തരവ്. ബാബുവിന്റെ കുടുംബത്തിന് 10 ലക്ഷം രൂപ വാഗ്ദാനം ചെയ്‌തെങ്കിലും ആറ് കുടുംബാംഗങ്ങളുടെ പേരിലാണ് തുക നിക്ഷേപിച്ചത്. പലിശ മാത്രമാണ് കുടുംബാംഗങ്ങള്‍ക്ക് പിന്‍വലിക്കാന്‍ കഴിയുന്നത്. പലിശ കൊണ്ടു മാത്രം ജീവിതത്തിന്റെ രണ്ടറ്റം കൂട്ടി മുട്ടിക്കാന്‍ പാടുപെടുകയാണന്ന് ബാബുവിന്റെ കുടുംബമെന്ന് കമ്മീഷന്‍ നടപടിക്രമത്തില്‍ ചൂണ്ടിക്കാണിച്ചിട്ടുണ്ട്. ശബ്ദമില്ലാത്തവരുടെ ശബ്ദമായി മാറാന്‍ കമ്മീഷന് ഉത്തരവാദിത്വമുണ്ടെന്നും നടപടിക്രമത്തില്‍ പറയുന്നു.