കല്‍പ്പറ്റ: രാജ്യത്ത് കോമണ്‍ സിവില്‍കോഡ് നടപ്പിലാക്കാനുള്ള നീക്കത്തില്‍ പ്രതിഷേധിച്ച് സമസ്ത ജില്ലാ കോ ഓഡിനേഷന്‍ കമ്മിറ്റിയുടെ ആഭിമുഖ്യത്തിലുള്ള ശരീഅത്ത് സംരക്ഷണ റാലിയും പൊതുസമ്മേളനവും ഇന്ന് കല്‍പ്പറ്റയില്‍ നടക്കും. വൈകിട്ട് മൂന്നരക്ക് കല്‍പ്പറ്റ എസ്.കെ.എം.ജെ പരിസരത്ത് നിന്നാരംഭിക്കുന്ന റാലി നഗരം ചുറ്റി വിജയ പമ്പ് പരിസരത്ത് സമാപിക്കും. അഞ്ചിന് നടക്കുന്ന പൊതുസമ്മേളനം സമസ്ത ജന.സെക്രട്ടറി പ്രൊ. ആലിക്കുട്ടി മുസ്‌ലിയാര്‍ ഉദ്ഘാടനം ചെയ്യും. എസ്.വൈ.എസ് സംസ്ഥാന സെക്രട്ടറി അബ്ദുസമദ് പൂക്കോട്ടൂര്‍, സാഹിത്യകാരന്‍ പി സുരേന്ദ്രന്‍, സമസ്ത ജില്ലാ പ്രസിഡന്റ് കെ.ടി ഹംസ മുസ്‌ലിയാര്‍, സമസ്ത കേന്ദ്ര മുശാവറ അംഗം വി മൂസക്കോയ മുസ്‌ലിയാര്‍, കെ.കെ അഹ്മദ് ഹാജി സംസാരിക്കും.