പയ്യന്നൂര്‍: കുന്നരു ഓണപ്പറമ്പ് വട്ടപറമ്പ്ചാലില്‍ സി.ഐ.ടി.യു പ്രവര്‍ത്തകന്റെ ഓട്ടോ കത്തിച്ചു. ഇന്നലെ പുലര്‍ച്ചെ രണ്ടോടെയാണ് കുന്നരു കാരന്താട്ടെ കൈക്കോളന്‍ രാഗേഷി(32)ന്റെ ഓട്ടോറിക്ഷ അഗ്‌നിക്കിരയാക്കിയത്. തിങ്കളാഴ്ച രാത്രി ഓട്ടം കഴിഞ്ഞ് അയല്‍വാസിയായ ചാക്കോയുടെ വീട്ടില്‍ നിര്‍ത്തിയിട്ടതായിരുന്നു ഓട്ടോ. ഓട്ടോ പൂര്‍ണമായും കത്തിനശിച്ചു. ഓട്ടോറിക്ഷ മറിച്ചിട്ടശേഷം പെട്രോള്‍ ഒഴിച്ചാണ് ഓട്ടോറിക്ഷ കത്തിച്ചത്. പയ്യന്നൂര്‍ പൊലിസ് സ്ഥലത്തെത്തി പരിശോധന നടത്തി. കഴിഞ്ഞ എട്ടിന് ഓണപ്പറമ്പിലെ കെ.പി. സുശീലന്റെ ബൈക്ക് കത്തിച്ച കേസില്‍ പ്രതിയായിരുന്നു രാഗേഷ്. ഈ സംഭവത്തില്‍ രാഗേഷ് കോടതിയില്‍ നിന്ന് ജാമ്യമെടുത്തിരുന്നു. ഓട്ടോറിക്ഷ കത്തിച്ച സംഭവത്തില്‍ പ്രതിഷേധിച്ച് കുന്നരു കാരന്താട്ട് ഉച്ചവരെ ഓട്ടോറിക്ഷാ തൊഴിലാളികള്‍ ഹര്‍ത്താലാചരിച്ചു.