മാനന്തവാടി: മഞ്ഞിന്റെ മാമല നാടിനെ സൂര്യന്‍ കീഴടക്കിയിരിക്കുന്നു. വെയിലിന്റെ കാഠിന്യം ശരീരത്തെ തളര്‍ത്തുമ്പോഴും മാനന്തവാടി വെക്കോഷനല്‍ ഹയര്‍ സെക്കന്‍ഡറിയിലെത്തിയ കായിക താരങ്ങള്‍ പോരാടുകയാണ്. തങ്ങളുടെ സ്‌കൂളിന്റെ അഭിമാനമുയര്‍ത്താനായി. എന്നാല്‍ ചുട്ടുപൊള്ളുന്ന വെയിലില്‍ മരത്തണലുകള്‍ക്ക് പുറമേ മേളയിലെ താരങ്ങള്‍ക്കും മറ്റും ആശ്വാസമാകുന്നത് സ്‌കൂളിലെ കുട്ടിപ്പോലിസിന്റെയും സൗഹൃദ ക്ലബിന്റെയും കുടിവെള്ള വിതരണമാണ്. തെല്ലൊന്നുമല്ല, ഇവര്‍ നല്‍കുന്ന ആശ്വാസം. ഓറഞ്ചും വെള്ളവും ഒരുക്കിയാണ് മാനന്തവാടി ജി.വി.എച്ച്.എസ്.എസിലെ സ്റ്റുഡന്റ്‌സ് പൊലിസ് കേഡറ്റ് മേളയില്‍ സജീവമാകുന്നത്. മറ്റു വിഭവങ്ങളില്ലെങ്കിലും സൗഹൃദ ക്ലബും സ്‌നേഹത്തോടെ കായിക മേളയിലേക്കെത്തിയവര്‍ക്ക് കുടിവെള്ളം നല്‍കുന്നു. മാനന്തവാടി ജനമൈത്രി പൊലിസിന്റെയും സഹായത്തോടെയാണ് കുട്ടിപ്പൊലിസിന്റെ കുടിവെള്ള വിതരണം. നാലു വര്‍ഷമായി എസ്.പി.സിയുടെ നേതൃത്വത്തില്‍ കുടിവെള്ളവും മറ്റു സഹായങ്ങളും മേളക്കുണ്ട്. ജനമൈത്രി പൊലിസ് ഡി.ഐ ബഷീറാണ് കുട്ടികള്‍ക്ക് നേതൃത്വം നല്‍കുന്നത്. 42 പേരാണ് സ്‌കൂളിലെ എസ്.പി.സി യൂനിറ്റിലുള്ളത്. 100 പേരടങ്ങുന്നതാണ് സൗഹൃദ ക്ലബ്. മേളയില്‍ 10 പേര്‍ വീതമാണ് ഓരോ ദിവസവും വെള്ളം വിതരണം ചെയ്യാന്‍ സ്‌കൂളിലെ മരച്ചുവട്ടിലൊരുക്കിയ തണ്ണീര്‍ പന്തലിലെത്തുന്നത്. പി.സി വത്സല ടീച്ചറുടെ നേതൃത്വത്തിലാണ് ക്ലബിന്റെ പ്രവര്‍ത്തനം. മേളക്ക് കുടിനീര്‍ നല്‍കുന്ന കുട്ടിപ്പൊലിസിന്റെയും സൗഹൃദ ക്ലബിന്റെയും തണ്ണീര്‍പ്പന്തലുകള്‍ സന്ദര്‍ശിച്ച ഒ.ആര്‍ കേളു എം.എല്‍.എ വിദ്യാര്‍ഥികളെ അഭിനന്ദിച്ചു.