നെയ്യാറ്റിന്‍കര: അമരവിള ചെക്‌പോസ്റ്റില്‍ കോടികളുടെ സ്വര്‍ണം പിടികൂടി.
ഇന്നലെ വൈകുന്നേരം മൂന്ന് മണിക്ക് നഗര്‍കോവിലില്‍ നിന്നും തിരുവനന്തപുരത്തേക്ക് കാറില്‍ കടത്താന്‍ ശ്രമിച്ച 12കിലോ സ്വര്‍ണമാണ് അമരവിള എക്‌സൈസ് വാഹന പരിശോധനയ്ക്കിടയില്‍ പിടികൂടിയത്.മൂന്ന് കോടി അമ്പത്തിനാല് ലക്ഷം രൂപ വിലമതിപ്പുള്ള സ്വര്‍ണമാണ് പിടികൂടിയത്.വാഹനത്തിലുണ്ടായിരുന്ന തക്കല ഇരണിയൂര്‍ ജി.കെ ഭവനില്‍ ഗിരീഷ്(31),ശുചീന്ദ്രം തുപ്പകുളം തെരുവ് സ്വദേശി ബാലസുബ്രമണി(23) എന്നിവരെ കസ്റ്റഡിയിലെടുത്തു. തമിഴ്‌നാട്ടില്‍ നിന്നും തലസ്ഥാനഗരത്തില്‍ എം.ജി.റോഡിലുള്ള പ്രമുഖ ജുവലറിയിലേക്കാണ് ഇത് കൊണ്ടുവന്നതെന്ന് ഇവര്‍ ഉദ്യോഗസ്ഥരോട് പറഞ്ഞു.പ്രതികളെയും സ്വര്‍ണവും
നികുതി വകുപ്പ് ഉദ്യോഗസ്ഥര്‍ക്ക് കൈമാറി.
അമരവിള എക്‌സൈസ് സി.ഐ എസ്.ഷാജഹാന്‍,ഇന്‍സ്‌പെക്ടര്‍ അന്‍വര്‍ സാദത്ത്,പ്രിവന്റീവ് ഓഫിസര്‍മാരായ പത്മകുമാര്‍,മനോജ്,സെല്‍വരാജ്,സിവില്‍ എക്‌സൈസ് ഓഫിസര്‍മാരായ സാജു,ഗിരീഷ്‌കുമാര്‍,എന്നിവരടങ്ങുന്ന എക്‌സൈസ് സംഘമാണ് സ്വര്‍ണം പിടികൂടിയത്.