എടപ്പാള്‍:വ്യാജഭാഗ്യക്കുറി നല്‍കി പണം തട്ടിയതായി പരാതി. എടപ്പാളിലെ കേരള ഭാഗ്യകുറിയുടെ ചെറുകിട കച്ചവടക്കാരനായ വാസുവിനാണു ബൈക്കിലെത്തിയ സംഘം വ്യാജ ലോട്ടറി ടിക്കറ്റ് നല്‍കി കബളിപ്പിച്ചത്. 2000 രൂപ വീതം സമ്മാനമടിച്ചതായി പറഞ്ഞ് അക്ഷയ ലോട്ടറിയുടെ രണ്ടു ടിക്കറ്റ് വാസുവിനു കൈമാറി.പരിശോധനയില്‍ സമ്മാനമടിച്ചതായി ബോധ്യപെട്ടതിനെത്തുടര്‍ന്നു 2500രൂപയുടെ ടിക്കറ്റും 1500രൂപയും നല്‍കി. തുടര്‍ന്ന് ഈ ലോട്ടറികള്‍ മൊത്ത വിതരണക്കാരനു കൈമാറിയപ്പോഴാണു ലോട്ടറി വ്യാജമാണെന്നു തെളിഞ്ഞത്. ഇതിനു മുന്‍പും മേഖലയില്‍ സമാന തട്ടിപ്പുകള്‍ നടന്നിരുന്നു. ഇതേത്തുടര്‍ന്നു മൊത്തവിതരണക്കാര്‍ ബാര്‍ കോഡ് റീഡര്‍ ഉള്‍പ്പെടെയുള്ള സംവിധാനങ്ങള്‍ ഒരുക്കിയിട്ടുണ്ടണ്ട്.എന്നാല്‍ ചെറുകിട കച്ചവടക്കാര്‍ പത്രത്തില്‍ വരുന്ന റിസള്‍ട്ട് പരിശോധിച്ചാണു പണം നല്‍കുന്നത്. ഇതാണു ചെറുകിടകച്ചവടക്കാരെ ഇത്തരം സംഘങ്ങള്‍ ഉന്നംവെക്കുന്നതിന് കാരണമാകുന്നത്. വാസു ചങ്ങരംകുളം പൊലിസില്‍ പരാതി നല്‍കി.