പുനലൂര്‍: മദ്യലഹരിയില്‍ കാറോടിച്ച് നഗരത്തില്‍ ഭീകരാന്തരീക്ഷം സൃഷ്ടിച്ച യുവാവ് മൂന്ന് വഴിയാത്രക്കാരെ ഇടിച്ചുതെറിപ്പിച്ചു. ഒരാള്‍ മരിച്ചു.
കൊട്ടാരക്കര ഇഞ്ചക്കാട് കൊച്ചുചരുവിള വീട്ടില്‍ ജോയിക്കുട്ടി (49) ആണ് മരിച്ചത്. കഴിഞ്ഞദിവസം രാത്രി എട്ടോടെ ചെമ്മന്തൂര്‍ ജങ്ഷന് സമീപത്തായിരുന്നു സംഭവം. മദ്യപിച്ച് അമിതവേഗതയില്‍ മാരുതികാര്‍ ഓടിച്ചെത്തിയ അഷ്ടമംഗലം അരുണോദയത്ത് വീട്ടില്‍ അനന്തുവാണ് അപകടമുണ്ടാക്കിയതെന്ന് പൊലിസ് അറിയിച്ചു. പുനലൂര്‍ പൊലിസ് പ്രതിയെ അറസ്റ്റ് ചെയ്തിട്ടുണ്ട്. റോഡരികില്‍ നിന്ന മൂന്നുപേരെയാണ് കാറിടിച്ച് തെറിപ്പിച്ചത്. ഗുരുതരമായി പരുക്കേറ്റ ജോയിക്കുട്ടിയെ തിരുവനന്തപുരം മെഡിക്കല്‍ കോളജ് ആശുപത്രിയിലേക്ക് കൊണ്ടുപോയെങ്കിലും വഴിമധ്യേ മരിച്ചു. അപകടത്തില്‍ പരുക്കേറ്റ മറ്റു രണ്ടുപേര്‍ പുനലൂരിലെ സ്വകാര്യ ആശുപത്രിയില്‍ ചികിത്സയിലാണ്.