സാന്റിയാഗോ: ഫിദല്‍ കാസ്‌ട്രോയുടെ ചിതാഭസ്്മം അടക്കം ചെയ്തത് സാന്റിയാഗോയിലെ സാന്റ ഇഫിഗെനിയ സെമിത്തേരിയിലെ ഗ്രാനൈറ്റ് പാറയില്‍. ഗ്രാനൈറ്റിന്റെ വലിയ ഉരുളന്‍ കല്ലിന് ഉള്ളില്‍ പെട്ടിവയ്ക്കാന്‍ കൊത്തിയെടുത്ത ഭാഗത്താണ് ചുവന്ന ദേവദാരുവിന്റെ മരപ്പെട്ടിയില്‍ സൂക്ഷിച്ച ചിതാഭസ്മം നിക്ഷേപിച്ച് അടച്ചത്.
സഹോദരനും ക്യൂബന്‍ പ്രസിഡന്റുമായ റൗള്‍ കാസ്‌ട്രോയാണ് ചിതാഭസ് മ പെട്ടി സൈനികരില്‍ നിന്ന് ഏറ്റുവാങ്ങി സംസ്‌കരിച്ചത്. ക്യൂബന്‍ സൈന്യം ആദരസൂചകമായി 21 ആചാരവെടിയുതിര്‍ത്തു. വെളുത്ത യൂനിഫോമില്‍ രണ്ട് സൈനികരാണ് ആചാരവെടിവച്ചത്. ദേശീയഗാനവും ആലപിച്ചു. സൈനിക യൂനിഫോമിലായിരുന്ന റൗള്‍ കാസ്‌ട്രോ ഫിദലിനോടുള്ള ആദരസൂചകമായി ജനറല്‍ സ്ഥാനചിഹ്‌നമായ നാലു നക്ഷത്രങ്ങള്‍ തന്റെ യൂനിഫോമില്‍ നിന്ന് താല്‍ക്കാലികമായി നീക്കിയിരുന്നു.
പ്രാദേശിക സമയം ഞായറാഴ്ച രാവിലെ ഒന്‍പതിനായിരുന്നു ചടങ്ങുകള്‍ സമാപിച്ചത്. ചിതാഭസ്മം പെട്ടിയിലാക്കി ഗ്രാനൈറ്റ് കല്ലില്‍ നിക്ഷേപിച്ചതിനു പുറമെ കറുത്ത ഗ്രാനൈറ്റ് പാളികൊണ്ട് അടച്ചു. അതില്‍ ഫിദല്‍ എന്ന് രേഖപ്പെടുത്തി. സംസ്‌കാരത്തിനു ശേഷം റൗള്‍ കാസ്‌ട്രോ ശവകുടീരത്തിനു സല്യൂട്ട് നല്‍കി. 20ാം നൂറ്റാണ്ടിനെ സ്വാധീനിച്ച വ്യക്തികളില്‍ മുന്‍നിരയിലാണ് ഫിദല്‍ കാസ്‌ട്രോയുടെ സ്ഥാനം.