കണ്ണൂര്‍: വരള്‍ച്ചയെ നേരിടാന്‍ ഹരിത കേരള മിഷന്‍ പദ്ധതിയില്‍ 500 ലേറെ തടയണകള്‍ നിര്‍മിച്ചു പേരാവൂര്‍ ഗ്രാമപഞ്ചായത്തു ശ്രദ്ധേയമായി. പുഴകളിലെയും തോടുകളിലെയും വെള്ളം പരമാവധി സ്ഥലങ്ങളില്‍ കെട്ടിനിര്‍ത്തി ഭൂമിയിലേക്ക് ഇറക്കിവിടുകയെന്ന ലക്ഷ്യത്തോടെയാണു തടയണകള്‍ നിര്‍മിച്ചത്. പൂര്‍ണമായും ജനപങ്കാളിത്തത്തോടെയായിരുന്നു തടയണകളുടെ നിര്‍മാണം. വാര്‍ഡുസഭകള്‍ ചേര്‍ന്നു ജല സംരക്ഷണ സമിതികള്‍ ചേര്‍ന്നാണു പദ്ധതി നടപ്പാക്കിയത്. ഇതിന്റെഫലമായി തൊട്ടടുത്ത പഞ്ചായത്തിലുള്‍പ്പെടെയുള്ള കിണറുകളിലും കുളങ്ങളിലും രണ്ടു കോല്‍ വരെ ജലനിരപ്പ് ഉയര്‍ന്നതായി പഞ്ചായത്ത് പ്രസിഡന്റ് ജിജി ജോയ് പറഞ്ഞു. തടയണ നിര്‍മാണത്തിലെ നേരിട്ടുള്ള പങ്കാളിത്തം കുട്ടികള്‍ ഉള്‍പ്പെടെയുള്ളവരെ ജലസംരക്ഷണത്തെക്കുറിച്ച് കൂടുതല്‍ ബോധമുള്ളവരാക്കി മാറ്റിയതായും പഞ്ചായത്ത് പ്രസിഡന്റ് പറഞ്ഞു.
ഇതിനകം 1, 4, 13, 15 വാര്‍ഡുകളില്‍ ജൈവ പച്ചക്കറി കൃഷിയും ആരംഭിച്ചുകഴിഞ്ഞു.  പഞ്ചായത്തിന്റെ നേതൃത്വത്തില്‍ പ്ലാസ്റ്റിക് ശേഖരിച്ച് സംസ്‌ക്കരിക്കുന്ന പ്രവര്‍ത്തനം എട്ടിനു  തുടങ്ങും.
മാലിന്യമില്ലാത്ത മംഗല്യം പരിപാടിക്കും പഞ്ചായത്തില്‍ തുടക്കമായി. പഞ്ചായത്ത് ഓഫിസ് ഡിസ്‌പോസബ്ള്‍ ഫ്രീയാക്കുന്ന പ്രഖ്യാപനവും ഡിസംബര്‍ എട്ടിന് നടക്കും.