കൊല്ലം: അര്‍ധരാത്രിയില്‍ ആയുധങ്ങളുമായെത്തിയ സംഘം ഇരവിപുരം റെയില്‍വെ സ്റ്റേഷനിലെ പ്ലാറ്റ്‌ഫോമില്‍ കിടന്നുറങ്ങുകയായിരുന്ന തമിഴ് കച്ചവട സംഘത്തെ ആക്രമിച്ചശേഷം പണം കവര്‍ന്നു. വ്യാഴാഴ്ച അര്‍ധരാത്രി ഒരു മണിയോടെയായിരുന്നു സംഭവം. പ്ലാറ്റ്‌ഫോമിലെ ബഞ്ചില്‍ കിടന്നുറങ്ങുകയായിരുന്ന തെങ്കാശി സ്വദേശികളെ വിളിച്ചുണര്‍ത്തിയ ശേഷമായിരുന്നു തലക്കടിച്ച് പരുക്കേല്‍പ്പിച്ച് ഇവരുടെ കൈയിലുണ്ടായിരുന്ന 2,500 രൂപാ കവര്‍ന്നത്. നിലവിളികേട്ട് ഓടിക്കൂടിയ പ്രദേശവാസികള്‍ പരുക്കേറ്റവരെ കൊല്ലത്തെ ആശുപത്രിയിലെത്തിച്ചു.
കാടുകയറി കിടക്കുന്ന ഇരവിപുരം റെയില്‍വെ സ്റ്റേഷനില്‍ വൈകിട്ടു തിരുവനന്തപുരം ഭാഗത്തേക്കുള്ള ട്രെയിന്‍ പോയി കഴിഞ്ഞാല്‍ സ്റ്റേഷന്‍ കരാറെടുത്തിട്ടുള്ളവര്‍ പ്ലാറ്റ്‌ഫോമിലുള്ള വിളക്കുകള്‍ അണച്ചു പോകുന്നതിനാല്‍ സ്റ്റേഷനും പരിസരവും രാത്രികാലങ്ങളില്‍ ഇരുട്ടിലാകുന്നതായി പരിസരവാസികള്‍ ആരോപിക്കുന്നു. രാത്രികാലങ്ങളില്‍ ഇരവിപുരം പൊലിസ് സ്റ്റേഷന്‍ പരിസരത്ത് പെട്രോളിങ് നടത്തണമെന്നും സ്റ്റേഷനില്‍ വിളക്ക് കത്തിക്കാന്‍ ആവശ്യമായ നടപടികള്‍ സ്വീകരിക്കണമെന്നും നാട്ടുകാര്‍ ആവശ്യപ്പെട്ടു.