ഈരാറ്റുപേട്ട: തടവനാല്‍ പുത്തന്‍ പള്ളി ഭാഗത്തു നിര്‍മിക്കുന്ന പാലത്തിനു സ്ഥലം വിട്ടു നല്‍കില്ലന്ന ആരോപണം അടിസ്ഥാന രഹിതമാണന്നും  സ്ഥലം വിട്ടു നല്‍കാനുള്ള നടപടിക്രമങ്ങള്‍ പൂര്‍ത്തിയായതായി പുത്തന്‍ പള്ളി ജമാഅത്ത് പരിപാലന സമിതി ഭാരവാഹികള്‍ വര്‍ത്താസമ്മേളനത്തില്‍ അറിയിച്ചു.  
ഈ നാടിന്റെ പൊതു വികാരം മാനിച്ച് മുടങ്ങിക്കിടക്കുന്ന പാലം പണി ഉടന്‍ ആരംഭിക്കുന്നതിനു ബന്ധപ്പെട്ടവര്‍ അടിയന്തിര പ്രാധാന്യം നല്‍കണമെന്നും ഭാരവാഹികള്‍ ആവശ്യപ്പെട്ടു.  സ്ഥലം വിട്ടു നല്‍കുന്നതിനു പള്ളി ജമാഅത്ത് ഭാരവാഹികള്‍ തടസം നില്‍ക്കുന്നു എന്ന ആക്ഷന്‍ കൗണ്‍സിലിന്റെ പ്രസ്താവന അടിസ്ഥാന രഹിതമാണന്നും അവര്‍ പറഞ്ഞു.
വാര്‍ത്താസമ്മേളനത്തില്‍ ജനറല്‍ സെക്രട്ടറി കെ.കെ മുഹമ്മദ് സാലി, ട്രഷറര്‍ വി.കെ നാസര്‍,  സെക്രട്ടറി കെ.എ പരീത്, മുത്തവല്ലി, പി.പി റഷീദ്, മാനേജര്‍ കെ.എം നിസാര്‍ എന്നിവര്‍ പങ്കെടുത്തു.
അതേസമയം  ബൈപാസ് പാലത്തിനു പള്ളിയുടെ കൈവശം ഇരിക്കുന്ന 1.6 സെന്റ് സ്ഥലത്തിന്റെ സ്ഥലമെടുപ്പ് ഇന്നലെ പൊതുമരാമത്ത് വകുപ്പ് ഉദ്യോഗസ്ഥന്മാര്‍ അളന്നു തിരിച്ച് കല്ലിട്ടു.
മുടങ്ങി കിടക്കുന്ന എല്ലാ പൊതുമരാമത്ത് വേലകളും ഉടന്‍ പൂര്‍ത്തികരിക്കണമെന്നുള്ള സംസ്ഥാ സര്‍ക്കാരിന്റെ ഉത്തരവ് പ്രകാരമാണു പൊതു മരാമത്ത് വകുപ്പ് ഈ പാലത്തിനു വേണ്ടിയുള്ള സ്ഥലം അളന്നു തിട്ടപ്പെടുത്തിയത്. ഇതോടു കൂടി ആറു മാസമായി മുടങ്ങി കിടന്ന പാലം പണി യാഥാര്‍ഥ്യമാകുമെന്ന് ഉറപ്പായി.
കഴിഞ്ഞ ദിവസം ഈ പാലം പണി മുടങ്ങി കിടക്കുന്നതിനെതിരേ നാട്ടുകാര്‍ ആക്ഷന്‍ കമ്മിറ്റി രൂപീകരിച്ച് രംഗത്ത് വന്നിരുന്നു.