ദേലംപാടി: സ്‌കൂള്‍ തുറന്ന് ആറു മാസം കഴിഞ്ഞിട്ടും അറബി അധ്യാപകരെ നിയമിക്കാത്തതു കാരണം പഠനം അവതാളത്തില്‍. ദേലംപാടി ഗവണ്‍മെന്റ് വൊക്കേഷണല്‍ ഹയര്‍ സെക്കന്‍ഡറി സ്‌കൂളിലെ വിദ്യാര്‍ഥികള്‍ക്കാണ് ഈ ദുരിതം. ഹൈസ്‌കൂള്‍, എല്‍.പി വിഭാഗങ്ങളിലായി ദിവസ വേതനാടിസ്ഥാനത്തില്‍ നേരത്തെ രണ്ട് അറബി അധ്യാപകരാണ് ഇവിടെയുണ്ടായിരുന്നത്.
കഴിഞ്ഞ വേനലവധി കഴിഞ്ഞു സ്‌കൂള്‍ തുറന്നതിനു ശേഷം പുതിയ അധ്യാപകരെ നിയമിച്ചിട്ടില്ല. ഒരു മാസം മുമ്പ് എല്‍.പി വിഭാഗത്തിലേക്കു സ്ഥിരമായി ഒരു അധ്യാപകനെ നിയമിച്ചെങ്കിലും ഒരു മാസം മാത്രമാണ് ഇവിടെ കഴിഞ്ഞത്. തുടര്‍ന്ന് അദ്ദേഹം മുന്‍പുണ്ടായിരുന്ന സ്‌കൂളിലേക്കു സ്ഥലം മാറ്റം വാങ്ങി പോവുകയായിരുന്നു. 14ന് അര്‍ദ്ധവാര്‍ഷിക പരീക്ഷ ആരംഭിക്കാനിരിക്കെ ഇതുവരെയായി ഒരു പാഠം പോലും എടുക്കാത്തതിനാല്‍ എങ്ങനെ പരീക്ഷയെഴുതുമെന്നറിയാതെ വിഷമിച്ചിരിക്കുകയാണു വിദ്യാര്‍ഥികള്‍.
അറബി പഠിപ്പിക്കാന്‍ അധ്യാപകരില്ലാതെ കഷ്ടപ്പെടുമ്പോഴും കഴിഞ്ഞ മാസം അഡൂരില്‍ നടന്ന കുമ്പള സബ് ജില്ലാ കലോത്സവത്തില്‍ ഹയര്‍ സെക്കന്‍ഡറി വിഭാഗം അറബികലാമേളയില്‍ മൂന്നാം സ്ഥാനം നേടി കഴിവു തെളിയിച്ചിരിക്കുകയാണ് ഇവിടെത്തെ വിദ്യാര്‍ഥികള്‍. അധ്യാപകനെ നിയമിക്കണമെന്നാവശ്യപ്പെട്ടു നിരവധി തവണ പി.ടി.എ കമ്മിറ്റിയും നാട്ടുകാരും അധികൃതരെ സമീപിച്ചെങ്കിലും ഇതുവരെ ഒരു നടപടിയുമുണ്ടായില്ല.