പള്ളിക്കല്‍: പള്ളിക്കല്‍ ബസാറില്‍ മിനിബസ് ഓവുചാലിലേക്ക് ചെരിഞ്ഞുണ്ടായ അപകടത്തില്‍ വിദ്യാര്‍ഥികളുള്‍പ്പെടെ നാലുപേര്‍ക്ക് പരുക്ക്. ആയിഷക്കുട്ടി (53), പുത്തൂര്‍ പള്ളിക്കല്‍ ഹയര്‍സെക്കന്‍ഡറി സ്‌കൂള്‍ വിദ്യാര്‍ഥികളായ ശഹീബ്ഹാരിസ് (15), സഫ്‌ന(14) എന്നിവര്‍ക്കും ബസ് ഡ്രൈവര്‍ക്കുമാണ് പരുക്കേറ്റത്. ഇവരെ ഫറോക്ക് ചുങ്കത്തെ സ്വകാര്യ ആശുപത്രിയില്‍ പ്രവേശിപ്പിച്ചു.
ആരുടെയും പരുക്ക് ഗുരുതരമല്ല. യൂനിവേഴ്‌സിറ്റിയില്‍ നിന്നു കൊണ്ടോട്ടിയിലേക്ക് പോകുന്ന മിനിബസ് ഇന്നലെ ഉച്ചയോടെ പരുത്തിക്കോട് റോഡില്‍ വച്ചാണ് അപകടത്തില്‍പ്പെട്ടത്. നിയന്ത്രണം വിട്ട ബസ് റോഡിന്റെ വലതുവശത്തുള്ള ഓവുചാലിലേക്ക് കൂപ്പുകുത്തുകയായിരുന്നു. യാത്രക്കാര്‍ കുറവായതിനാലും ഓവുചാലിനോട് ചേര്‍ന്നുള്ള മതിലില്‍ ഇടിച്ചു നിന്നതിനാലും വന്‍ദുരന്തം ഒഴിവായി. മതില്‍ ഭാഗികമായി തകര്‍ന്നിട്ടുണ്ട്. നിറയെ വളവുകളുള്ളതും വീതികുറഞ്ഞതുമായ റോഡില്‍ അപകടം പതിവായിരിക്കുകയാണ്. ഈ റൂട്ടിലൂടെയുള്ള ബസുകളുടെ അമിത വേഗതക്കെതിരേ നാട്ടുകാരുടെ പ്രതിഷേധവും ശക്തമായിട്ടുണ്ട്.