കൊയിലാണ്ടി: വിദ്യാര്‍ഥികളെ കുത്തിനിറച്ച് കൊണ്ടുപോയ സ്‌കൂള്‍വാനില്‍ നിന്നു തെറിച്ചു വീണ് യു.കെ.ജി.വിദ്യാര്‍ഥിക്ക് പരുക്കേറ്റു. കൊയിലാണ്ടി ഐ.സി.എസ് സ്‌കൂളിലെ വിദ്യാര്‍ഥിയായ ഊരള്ളൂര്‍ കുന്നത്ത് മീത്തല്‍ മുഹമ്മദ് സിയാനി (5) നാണ് പരുക്കേറ്റത്.
വിദ്യാര്‍ഥി കൊയിലാണ്ടി താലൂക്ക് ആശുപത്രിയില്‍ ചികിത്സ തേടി. കഴിഞ്ഞ ദിവസം രാവിലെ ഒന്‍പതോടെ കൊയിലാണ്ടി റെയില്‍വേ സ്റ്റേഷനു സമീപം മുത്താമ്പി റോഡില്‍ വച്ചാണ് അപകടം. സ്‌കൂള്‍വാനില്‍ യാത്ര ചെയ്യുന്നതിനിടെ സ്വമേധയാ ഡോര്‍ തുറക്കുകയായിരുന്നു.
വാനിലുണ്ടായിരുന്ന മറ്റു കുട്ടികളുടെ നിലവിളിയെ തുടര്‍ന്നു നാട്ടുകാരെത്തിയാണ് കുട്ടിയെ ആശുപത്രിയിലെത്തിച്ചത്. സ്‌കൂള്‍ വാനില്‍ 27 ഓളം കുട്ടികള്‍ ഉണ്ടായിരുന്നുവെന്നു നാട്ടുകാര്‍ പറഞ്ഞു. അപകടത്തെ തുടര്‍ന്ന് നാട്ടുകാര്‍ സ്‌കൂള്‍വാന്‍ തടഞ്ഞിട്ടു. കൊയിലാണ്ടി പൊലിസെത്തി നടപടി സ്വീകരിച്ചതോടെയാണ് പ്രതിഷേധക്കാര്‍ മടങ്ങിയത്. പൊലിസ് കേസെടുത്ത് അന്വേഷണമാരംഭിച്ചു.