കൂത്തുപറമ്പ്: ഓട്ടോറിക്ഷയില്‍ കടത്തുകയായിരുന്ന 256 കുപ്പി മാഹി മദ്യവുമായി ഒരാള്‍ അറസ്റ്റില്‍. അഴീക്കോട്ടെ പയങ്കുടിയില്‍ വീട്ടില്‍ കെ റിജേഷ്(25) ആണ് അറസ്റ്റിലായത്. ക്രിസ്മസ് പുതുവത്സരാഘോഷത്തോടനുബന്ധിച്ചുള്ള സ്‌പെഷല്‍ ഡ്രൈവിന്റെ ഭാഗമായി കൂത്തുപറമ്പ് എക്‌സൈസ് റെയ്ഞ്ച് ഉദ്യോഗസ്ഥര്‍ പൂക്കോട് നടത്തിയ വാഹന പരിശോധനയ്ക്കിടെയാണ് ഇയാള്‍ പിടിയിലായത്. എക്‌സൈസ് സംഘത്തെ കണ്ട ഉടന്‍ വാഹനം നിര്‍ത്തി ഓട്ടോ ഡ്രൈവര്‍ അഴീക്കോട്ടെ ഷൈജു ഓടി രക്ഷപ്പെട്ടു. ഓട്ടോറിക്ഷയുടെ പിന്‍ സീറ്റിന്റെ അടിയില്‍ രഹസ്യ അറയുണ്ടാക്കി അടുക്കിവച്ച നിലയിലായിരുന്നു മദ്യം. 375 മില്ലി ലിറ്റര്‍ വീതമുള്ള 256 കുപ്പി മദ്യവും ഓട്ടോറിക്ഷയും കസ്റ്റഡിയിലെടുത്തു. പരിശോധനയ്ക്കിടെ ഓടി രക്ഷപ്പെട്ട ഷൈജുവിനെ പിടികൂടാന്‍ അന്വേഷണം ഊര്‍ജിതമാക്കിയിട്ടുണ്ട്. മാഹിയില്‍ നിന്നു അഴീക്കോട് ഭാഗങ്ങളില്‍ ചില്ലറ വില്‍പനയ്ക്കായാണ് മദ്യം കൊണ്ടു പോകുന്നതതെന്നു ചോദ്യം ചെയ്യലില്‍ വ്യക്തമായി. അറസ്റ്റിലായ റിജേഷിനെ കൂത്തുപറമ്പ് ജുഡീഷല്‍ ഒന്നാം ക്ലാസ് മജിസ്‌ട്രേറ്റ് കോടതി റിമാന്‍ഡ് ചെയ്തു.
ഇരിട്ടി: കര്‍ണാടകത്തില്‍ നിന്നു വില്‍പ്പനക്കായി കടത്തിക്കൊണ്ടുവന്ന 40 കുപ്പി വിദേശ മദ്യവുമായി മധ്യവയസ്‌കനെ ഇരിട്ടി എക്‌സൈസ് സംഘം അറസ്റ്റ് ചെയ്തു. അയ്യന്‍കുന്ന് തുടിമരത്തെ പുത്തന്‍വീട്ടില്‍ സി.ടി തോമസിനെ(49) ആണ് ഇരിട്ടി എക്‌സൈസ് ഓഫിസര്‍ സി രഞ്ജിത്തും സംഘവും അറസ്റ്റ് ചെയ്തത്. 375 മില്ലി വീതം വരുന്ന 40 കുപ്പി കര്‍ണാടക മദ്യം ചാക്കില്‍ കെട്ടി സൂക്ഷിച്ച നിലയിലായിരുന്നു.