തിരുവനന്തപുരം: തുമ്പ സെന്റ് സേവ്യേഴ്‌സ് കോളജ് മൈതാനത്തു നടന്ന രഞ്ജി ട്രോഫി ഗ്രൂപ്പ് ബി പോരാട്ടത്തില്‍ ഒഡിഷക്കെതിരേ ജാര്‍ഖണ്ഡിനു ഇന്നിങ്‌സ് ജയം. ഇന്നിങ്‌സിനും 93 റണ്‍സിനുമാണ് ജാര്‍ഖണ്ഡ് വിജയം സ്വന്തമാക്കിയത്. ആദ്യം ബാറ്റു ചെയ്ത ഒഡിഷ ഒന്നാം ഇന്നിങ്‌സില്‍ 152 റണ്‍സെടുത്തപ്പോള്‍ ജാര്‍ഖണ്ഡ് 348 റണ്‍സെടുത്ത് 196 റണ്‍സിന്റെ ലീഡ് സ്വന്തമാക്കി. രണ്ടാമിന്നിങ്‌സില്‍ ബാറ്റു ചെയ്യാനിറങ്ങിയ ഒഡിഷയുടെ പോരാട്ടം വെറും 103 റണ്‍സില്‍ അവസാനിപ്പിച്ചാണ് ജാര്‍ഖണ്ഡ് വിജയം പിടിച്ചത്. ജയത്തോടെ ബോണസ് പോയിന്റ് സ്വന്തമാക്കി ഗ്രൂപ്പ് ചാംപ്യന്‍മാരായി ജാര്‍ഖണ്ഡ് ക്വാര്‍ട്ടറിലേക്ക് മുന്നേറി.
മൂന്നു വീതം വിക്കറ്റുകള്‍ വീഴ്ത്തിയ ഷഹബാസ് നദീം, കൗശല്‍ സിങ് എന്നിവരുടെ ബൗളിങാണ് ഒഡിഷയെ തകര്‍ത്തത്. ആദ്യ ഇന്നിങ്‌സില്‍ നദീം നാലു വിക്കറ്റുകള്‍ വീഴ്ത്തിയിരുന്നു. നേരത്തെ 86 റണ്‍സെടുത്തു പുറത്താകാതെ നിന്ന് കൗശല്‍ ബാറ്റിങിലും തിളങ്ങി ഓള്‍റൗണ്ട് മികവ് പുറത്തെടുത്തു. കൗശല്‍ സിങ്ങാണ് കളിയിലെ കേമന്‍. ജാര്‍ഖണ്ഡിനായി നായകന്‍ സൗരഭ് തിവാരി 78 റണ്‍സെടുത്തു. ക്വാര്‍ട്ടര്‍ പോരാട്ടങ്ങള്‍ ഈ മാസം 24 മുതല്‍ 28 വരെ അരങ്ങേറും.