ന്യൂഡല്‍ഹി:പൊതു സ്ഥലത്ത് മാലിന്യം നിക്ഷേപിച്ചാല്‍ 10,000 രൂപ പിഴ ലഭിക്കുന്ന കുറ്റമായി ദേശീയ ഹരിത ട്രൈബ്യൂണല്‍ വിധി. മുനിസിപ്പല്‍ പ്രദേശങ്ങളില്‍ ഖരമാലിന്യം വലിയ സാമൂഹിക പ്രശ്‌നമായി മാറിയിട്ടുണ്ട്. ഡെല്‍ഹിയുള്‍പ്പെടെയുള്ള നഗരങ്ങളില്‍ ഇത്തരം മാലിന്യങ്ങള്‍ തീര്‍ക്കുന്ന ദുരിതം വളരെ വലുതാണെന്നും ദേശീയ ഹരിത ട്രൈബ്യൂണ്‍ നിരീക്ഷിച്ചു.
2016ലെ ഖരമാലിന്യ നിര്‍മാര്‍ജന നിയമത്തിന്റെ ചട്ടത്തില്‍ പ്രത്യേകമായി നിഷ്‌കര്‍ഷിക്കുന്ന വ്യവസ്ഥകള്‍ പ്രകാരം പൊതുജനാരോഗ്യത്തിന് ഹാനികരമായി മാറുന്ന തരത്തില്‍ മാലിന്യം പൊതുസ്ഥലത്ത് നിക്ഷേപിക്കരുതെന്ന് പറയുന്നുണ്ട്. ഹോട്ടലുകള്‍, റസ്റ്റോറന്റുകള്‍, അറവുശാലകള്‍, ഇറച്ചി വില്‍പ്പന കേന്ദ്രങ്ങള്‍, പച്ചക്കറി മാര്‍ക്കറ്റുകള്‍ എന്നിവിടങ്ങളില്‍ നിന്നാണ് മുനിസിപ്പല്‍ പ്രദേശങ്ങളില്‍ പ്രധാനമായും ഖരമാലിന്യങ്ങളുണ്ടാകുന്നത്. ഇവയെല്ലാം പ്രത്യേകമായി മുനിസിപ്പാലിറ്റിയുടെ മാലിന്യ ശേഖരണ വിഭാഗത്തിന് നിയമാനുസൃതമായ രീതിയില്‍ കൈമാറണമെന്നും ഹരിത ട്രൈബ്യൂണല്‍ വ്യക്തമാക്കുന്നു.
എന്നാല്‍ ഇതിന് വിരുദ്ധമായി വ്യക്തികള്‍, ഹോട്ടലുകള്‍, റസ്റ്റോറന്റുകള്‍, അറവുകേന്ദ്രങ്ങള്‍, പച്ചക്കറി മാര്‍ക്കറ്റുകള്‍ എന്നിവ മാലിന്യം അലസമായി പൊതു സ്ഥലത്ത് ജനങ്ങളുടെ ആരോഗ്യത്തിന് ഹാനികരമായ രീതിയില്‍ കൊണ്ടിട്ടാല്‍ പരിസ്ഥിതി നശീകരണത്തിനുള്ള നഷ്ടപരിഹാരമായി 10,000 രൂപ പിഴനല്‍കണമെന്നാണ് ട്രൈബ്യൂണല്‍ വ്യക്തമാക്കുന്നത്. ദേശീയ ഹരിത ട്രൈബ്യൂണല്‍ ചെയര്‍പേഴ്‌സണ്‍ ജസ്റ്റിസ് സ്വതന്ത്രകുമാറിന്റെ നേതൃത്വത്തിലുള്ള ബഞ്ചാണ് വിധി പുറപ്പെടുവിച്ചത്.
രാജ്യതലസ്ഥാനമായ ഡല്‍ഹിയില്‍ 9,600 മെട്രിക് ടണ്‍ ആണ് പ്രതിദിന ഖരമാലിന്യം. ഈ മാലിന്യം സംസ്‌കരിക്കാനുള്ള സംവിധാനം മുനിസിപ്പാലിറ്റികള്‍ സ്വീകരിക്കേണ്ടതുണ്ട്. ഇതിനായി ഓരോ മുനിസിപ്പല്‍ കോര്‍പ്പറേഷനുകളും ഒരു മാസത്തിനകം എന്തെല്ലാം നടപടികള്‍ സ്വീകരിച്ചുവെന്ന കാര്യം വ്യക്തമാക്കണമെന്നും ട്രൈബ്യൂണല്‍ വ്യക്തമാക്കി. മാലിന്യം അശ്രദ്ധമായി കൈകാര്യം ചെയ്യുന്ന സൊസൈറ്റികള്‍, റസിഡന്റ്‌സ് അസോസിയേഷനുകള്‍ എന്നിവര്‍ക്കും പിഴചുമത്താന്‍ ബന്ധപ്പെട്ട തദ്ദേശ സ്വയംഭരണ സ്ഥാപനങ്ങള്‍ക്ക് അധികാരമുണ്ടായിരിക്കുമെന്നും ദേശീയ ഹരിത ട്രൈബ്യൂണല്‍ വ്യക്തമാക്കി.