സൂറിച്ച്:സ്വിറ്റ്‌സര്‍ലന്റിലെ സൂറിച്ചില്‍ ഇസ്്‌ലാമിക് സെന്ററിന്റെ കീഴിലുള്ള പള്ളിയില്‍ തോക്കുധാരിയുടെ വെടിവയ്പില്‍ മൂന്നുപേര്‍ക്ക് പരുക്ക്. അക്രമിയെ വെടിയേറ്റു മരിച്ച നിലയില്‍ കണ്ടെത്തി.
24 കാരനായ സ്വിസ് പൗരനാണ് കൊല്ലപ്പെട്ടത്. സൊമാലിയന്‍ വംശജരുടെ നേതൃത്വത്തിലുള്ള ഇസ്‌ലാമിക് സെന്ററില്‍ തിങ്കളാഴ്ച വൈകിട്ടാണ് ഇയാള്‍ ആക്രമണം നടത്തിയത്. തുടര്‍ന്ന് അടുത്ത തെരുവിലെ പാലത്തിനടുത്ത് അക്രമിയെ വെടിയേറ്റു മരിച്ച നിലയില്‍ കണ്ടെത്തി. മൃതദേഹത്തിനടുത്ത് തോക്കും ഉണ്ടായിരുന്നു. ആക്രമണം നടത്തിയയാള്‍ തന്നെയാണ് കൊല്ലപ്പെട്ടതെന്ന് പൊലിസ് സ്ഥിരീകരിച്ചു.
പ്രതിക്ക് തീവ്രവാദബന്ധമില്ലെന്നും എന്നാല്‍ ആക്രമണം നടത്താനുള്ള കാരണം എന്തെന്ന് അറിയില്ലെന്നും പൊലിസ് പറഞ്ഞു. ബൈക്ക് മോഷണം ഉള്‍പ്പെടെയുള്ള കുറ്റകൃത്യങ്ങളില്‍ ഏര്‍പ്പെട്ടയാളാണ് ഇയാള്‍. വൈകിട്ട് അഞ്ചരയോടെയാണ് പള്ളിയില്‍ ആക്രമണം. 10 പേരാണ് അവിടെയുണ്ടായിരുന്നത്. പ്രതിക്കുവേണ്ടി പൊലിസ് തെരച്ചില്‍ നടത്തുമ്പോഴാണ് മൃതദേഹം കണ്ടെത്തിയത്.
ആക്രമണത്തെ സ്വിറ്റ്‌സര്‍ലന്റിലെ ഫെഡറേഷന്‍ ഓഫ് ഇസ്്‌ലാമിക് ഒര്‍ഗനൈസേഷന്‍ അപലപിച്ചു.