കുമ്പള: ജില്ലയിലെ കേരള ഓപണ്‍ സ്‌കൂള്‍ ഏകജാലക സംവിധാനത്തിലൂടെ പരീക്ഷയെഴുതുന്ന വിദ്യാര്‍ഥികളെ അറിയിക്കാതെ കേന്ദ്രം മാറ്റി നല്‍കിയതു പരീക്ഷാര്‍ഥികളെ ദുരിതത്തിലാക്കുന്നു. ഓണ്‍ലൈന്‍ സംവിധാനം വഴി പ്ലസ് വണ്‍ പരീക്ഷയെഴുതാന്‍ കാസര്‍കോട് ബി.ഇ.എം ഹയര്‍ സെക്കന്‍ഡറി സ്‌കൂള്‍ കേന്ദ്രമായി അപേക്ഷിച്ച നൂറോളം വിദ്യാര്‍ഥികളാണു പ്രതിസന്ധിയിലായത്.
ഓണ്‍ലൈന്‍ സംവിധാനം വഴി പ്ലസ് വണ്ണിനു അപേക്ഷ നല്‍കുന്ന വിദ്യാര്‍ഥികള്‍ക്ക് അവര്‍ക്ക് ഇഷ്ടമുള്ള ജില്ലയിലെ ഏതെങ്കിലും പത്തു പരീക്ഷാ കേന്ദ്രങ്ങള്‍ ഓപ്ഷനായി നല്‍കണമെന്നാണ് ചട്ടം.
ഇതു പ്രകാരം ഗതാഗത സൗകര്യവും എത്തിപ്പെടാന്‍ എളുപ്പവും അടിസ്ഥാനമാക്കിയാണു വിദ്യാര്‍ഥികള്‍ അപേക്ഷകളില്‍ അവര്‍ക്ക് ഇഷ്ടപ്പെട്ട സ്‌കൂളുകള്‍ തിരഞ്ഞെടുക്കുന്നത്. ഇങ്ങനെ നല്‍കുന്ന ഓപ്ഷനുകളുടെ മുന്‍ഗണനാ അടിസ്ഥാനത്തില്‍ പരീക്ഷാ കേന്ദ്രങ്ങള്‍ അനുവദിക്കുകയാണു പതിവ്.
ബി.ഇ.എം സ്‌കൂള്‍ പരീക്ഷ കേന്ദ്രമായി അപേക്ഷകളില്‍ നല്‍കിയ കുട്ടികള്‍ക്കു പരീക്ഷ കേന്ദ്രം അനുവദിച്ചിരുന്നതായി അറിയിപ്പു ലഭിച്ചിരുന്നു. എന്നാല്‍ പരീക്ഷാ ഫീസടക്കുന്നതിനു കുട്ടികള്‍ സ്‌കൂളില്‍ ചെന്നപ്പോഴാണ് സെന്റര്‍ എടനീര്‍ ഹയര്‍ സെക്കന്‍ഡറിയിലേക്കു മാറ്റിയതായി അറിയുന്നത്.
തങ്ങള്‍ ഓപ്ഷന്‍ നല്‍കാത്ത സ്‌കൂളാണിതെന്നും കിലോമീറ്ററുകളോളം സഞ്ചരിച്ച് ഈ സെന്ററില്‍ പരീക്ഷയെഴുതുക അസാധ്യമാണെന്നും കാണിച്ചു വിദ്യാര്‍ഥികള്‍ തിരുവനന്തപുരത്തുള്ള ഓപണ്‍ സ്‌കൂള്‍ സംസ്ഥാന കാര്യാലയവുമായി ബന്ധപ്പെട്ട് പരാതി നല്‍കിയെങ്കിലും ഈ സ്‌കൂളില്‍ ഇത്രയും കുട്ടികളെ ഉള്‍ക്കൊള്ളിക്കാനുള്ള സ്ഥലസൗകര്യമില്ലെന്നറിയിച്ചു വിദ്യാഭ്യാസ വകുപ്പില്‍ നിന്ന് സ്‌കൂള്‍ അധികൃതര്‍ അനുകൂല ഉത്തരവു നേടിയിട്ടുണ്ടെന്ന മറുപടിയാണു ലഭിച്ചത്. അതിനാലാണു കുട്ടികളെ അനുവദിച്ച സെന്ററിന് ഏറ്റവും അടുത്തുള്ള എടനീരിലേക്ക് മാറ്റിയതെന്നും ഓപണ്‍ സ്‌കൂള്‍ അധികൃതര്‍ വ്യക്തമാക്കി.
നിലവിലുള്ള കേന്ദ്രം മാറ്റുകയാണെങ്കില്‍ അപേക്ഷയില്‍ നല്‍കിയിട്ടുള്ള ഏതെങ്കിലും സ്‌കൂളിലേക്ക് സെന്റര്‍ മാറ്റി അനുവദിക്കണമെന്നാണു വിദ്യാര്‍ഥികളുടെ ആവശ്യം.