എടക്കര: തണ്ണിക്കടവ് ജനവാസ കേന്ദ്രത്തില്‍ കാട്ടാനക്കൂട്ടമിറങ്ങി. തണ്ണിക്കടവ് ക്വാറിപ്പടിയിലാണ് മൂന്ന് ആനയും ഒരു കുട്ടിയും അടങ്ങുന്ന സംഘം ജനവാസ കേന്ദ്രത്തില്‍ ഇറങ്ങിയത്. തോട്ടക്കാട് മൂസയുടെ വിറകുപുര തകര്‍ത്തു.
കുലച്ച വാഴകളും നശിപ്പിച്ചു. പുലര്‍ച്ചെ ഒന്നോടെയാണ് കാട്ടാനക്കൂട്ടം നാട്ടിലിറങ്ങിയത്. നേരം പുലര്‍ന്നിട്ടും ഇവ തിരികെ പോയിരുന്നില്ല. നാട്ടുകാര്‍ സംഘടിച്ച് ബഹളംവച്ച് തിരികെ ഓടിച്ചെങ്കിലും വൈകിട്ട് നാലോടെ ഗ്രൗണ്ട് പരിസരത്ത് വീണ്ടും ആനക്കൂട്ടത്തെ കണ്ടു.