തിരുവനന്തപുരം: എസ്.എഫ്.ഐയുടെ നേതൃത്വത്തില്‍ മുഴുവന്‍ കലാലയങ്ങളും സംസ്ഥാനത്തെ 1506 സഹകരണ ബാങ്കുകളില്‍  അക്കൗണ്ട് ആരംഭിക്കും. കലാലയങ്ങളെ കണ്ണികളാക്കുന്ന സഹകരണ സംരക്ഷണ മഹായഞ്ജം ജനുവരി 10 വരെ നീളും. വിദ്യാര്‍ഥികളില്‍ നിന്നും ചെറിയ തുക വാങ്ങിയാണു സഹകരണ ബാങ്കുകളില്‍ അക്കൗണ്ട് ആരംഭിക്കുക.'സഹകരണത്തെ സംരക്ഷിക്കാന്‍   കലാലയങ്ങള്‍ കൈകോര്‍ക്കുന്നു' എന്ന  മുദ്രാവാക്യവുമായി നടക്കുന്ന പരിപാടിയുടെ സംസ്ഥാനതല  ഉദ്ഘാടനം  തിരുവനന്തപുരം യൂനിവേഴ്‌സിറ്റി  കോളജില്‍  നടന്നു.
യൂനിവേഴ്‌സിറ്റി കോളജിലെ   വിദ്യര്‍ഥികളില്‍ നിന്ന് സ്വരൂപിച്ച തുകകൊണ്ട് കടകംപള്ളി സഹകരണ ബാങ്കില്‍ തുടങ്ങിയ അക്കൗണ്ടിന്റെ രേഖകള്‍ സഹകരണമന്ത്രി കടകംപള്ളി സുരേന്ദ്രന്‍ എസ്.എഫ്.ഐ  സംസ്ഥാന സെക്രട്ടറി എം. വിജിന് നല്‍കി ഉദ്ഘാടനം ചെയ്തു. ജയിക്ക് സി. തോമസ് അധ്യക്ഷനായ പരിപാടിയില്‍ എം.വിജിന്‍, എസ്.എഫ്. ഐ അഖിലേന്ത്യാ പ്രസിഡന്റ് വി.പി സാനു, കേന്ദ്ര കമ്മിറ്റിയംഗങ്ങളായ പ്രതിന്‍ സാജ് കൃഷ്ണ, ഖദീജത്ത് സുഹൈല, അഥീന സതീഷ്, ജില്ലാ പ്രസിഡന്റ് രാഹില്‍ ആര്‍. നാഥ് എന്നിവര്‍ സംസാരിച്ചു. പരിപാടിയോടനുബന്ധിച്ച് കേരളത്തിലെ എല്ലാ  ജില്ലകളിലും സെമിനാറുകളും അനുബന്ധ പരിപാടികളും സംഘടിപ്പിക്കും. നോട്ട്  പ്രതിസന്ധി പരിഹരിക്കണമെന്നും സഹകരണ  മേഖലയെ രക്ഷിക്കണമെന്നും ആവശ്യപ്പെട്ട് എല്‍.ഡി.എഫ് 29നു മനുഷ്യചങ്ങല സംഘടിപ്പിക്കും.