കോഴിക്കോട്: ഒരുവര്‍ഷം മുമ്പ് വിനോദയാത്രയ്ക്കിടെ അരീപ്പാറ വെള്ളച്ചാട്ടത്തിന് സമീപം പതങ്കയത്ത് മുങ്ങി മരിച്ച ദീപിക സീനിയര്‍ റിപ്പോര്‍ട്ടര്‍ പി. ജിബിനെ സുഹൃദ്‌സംഘം അനുസ്മരിച്ചു. ഒന്നാം ചരമവാര്‍ഷിക ദിനത്തില്‍ കോഴിക്കോട് കേശവമേനോന്‍ ഹാളില്‍ നടന്ന ചടങ്ങില്‍ സംസ്ഥാന വിജിലന്‍സ് ഡയറക്ടര്‍ ജേക്കബ് തോമസ് സംബന്ധിച്ചു. വായനക്കാരന്‍ ആരാണെന്നും അവരുടെ ആവശ്യമെന്താണെന്നും അറിഞ്ഞാണ് എഴുത്തുകാര്‍ പെരുമാറേണ്ടതെന്ന് 'എഴുത്ത്, വായന, സമൂഹം' എന്ന വിഷയത്തില്‍ നടത്തിയ പ്രഭാഷണത്തില്‍ അദ്ദേഹം പറഞ്ഞു.
ഗുട്ടന്‍ബര്‍ഗിന്റെ കാലം മുതല്‍ അഞ്ച് നൂറ്റാണ്ട് നിലനിന്നുപോന്ന എഴുത്ത്‌വായന സംസ്‌കാരത്തിന് ഇപ്പോള്‍ മാറ്റം വന്നുതുടങ്ങിയിട്ടുണ്ട്. ഡിജിറ്റല്‍ യുഗത്തില്‍ എഴുതുന്നവരേക്കാള്‍ വിവരം പലപ്പോഴും വായിക്കുന്നവര്‍ക്ക് ഉള്ളതായി മറുപടി എഴുത്തുകളില്‍ നിന്ന് വ്യക്തമാകും.
കസ്തൂരിരംഗന്‍ റിപ്പോര്‍ട്ടിനെ അടിസ്ഥാനമാക്കി മലയോര താമസക്കാര്‍ നേരിടുന്ന പ്രശ്‌നങ്ങളെ കുറിച്ചും കോടഞ്ചേരിയില്‍ വീടുതകര്‍ന്നവരെ കുറിച്ചുമെല്ലാം പി.ജിബിന്‍ തയ്യാറാക്കിയ റിപ്പോര്‍ട്ടുകള്‍ക്ക് പ്രതികരണമുണ്ടാവുകയും ചെയ്തത് അവ വായനക്കാരന്റെ അഭിരുചി അറിഞ്ഞുള്ളതായത് കൊണ്ടാണെന്നും ജേക്കബ് തോമസ് കൂട്ടിച്ചേര്‍ത്തു.
പ്രസ് ക്ലബ് പ്രസിഡന്റ് കമാല്‍ വരദൂര്‍ അധ്യക്ഷനായി. സെക്രട്ടറി എന്‍.രാജേഷ്, ഫാദര്‍ ജോയ്‌സ് വയലില്‍, സജീവന്‍ കല്ലേരി, എസ്. ശ്രീശാന്ത്, പി.വി.ജീജോ, രമേശ് കോട്ടൂളി, ബൈജു ബാപ്പുട്ടി, എ.കെ.ശ്രീജിത്ത്, എസ്.ജയകൃഷ്ണന്‍, എസ്.കെ.രാജേഷ് ഗുരുക്കള്‍, പി സുബീഷ് എന്നിവര്‍ ജിബിനെ അനുസമരിച്ചു. ജിബിന്റെ അച്ഛന്‍ പി.ബാബു മുഖ്യാതിഥി ജേക്കബ് തോമസിനുള്ള ഉപഹാരം സമര്‍പ്പിച്ചു. സുനില്‍ബേബി തയ്യാറാക്കിയ 'ജിബിന്‍ ഒരു ഓര്‍മ' ഡോക്യുമെന്ററി പ്രദര്‍ശനവും നടന്നു.