തളിപ്പറമ്പ്: തളിപ്പറമ്പ് താലൂക്ക് ഓഫിസ് വളപ്പിലെ സ്വകാര്യ വാഹന പാര്‍ക്കിങ് ജനുവരി ഒന്നു മുതല്‍ കര്‍ശനമായി തടയും. നിയന്ത്രണമില്ലാതെ വാഹനങ്ങള്‍ പാര്‍ക്ക് ചെയ്യുന്നത് കോമ്പൗണ്ടിലെ ഓഫിസുകളുടെ പ്രവര്‍ത്തനത്തെ ഗുരുതരമായി ബാധിച്ച സാഹചര്യത്തിലാണ് നടപടി. കഴിഞ്ഞ ദിവസം ചേര്‍ന്ന വകുപ്പ് മേധാവികളുടെ യോഗത്തിലാണ് ഇതു സംബന്ധിച്ച് തീരുമാനമായത്. താലൂക്ക് ഓഫിസ് ജിവനക്കാരുടെ വാഹനങ്ങളില്‍ പ്രത്യേക സ്റ്റിക്കര്‍ പതിപ്പിക്കാനും അവ മിനി സിവില്‍ സ്റ്റേഷനിലെ നടുമുറ്റത്ത് പാര്‍ക്ക് ചെയ്യാനും താലൂക്ക് ഓഫിസിന്റെ ഗെയ്റ്റ് വൈകുന്നേരം ആറു മുതല്‍ രാവിലെ ഒന്‍പതു വരെ അടച്ചിടാനും തീരുമാനിച്ചു.
മിനി സിവില്‍സ്റ്റേഷനില്‍ പ്രവര്‍ത്തിക്കുന്ന ഓഫിസികുളുടെ സ്ഥാനം സൂചിപ്പിക്കുന്ന ബോര്‍ഡ് മിനി സിവില്‍ സ്‌റ്റേഷന്‍ കവാടത്തില്‍ സ്ഥാപിക്കും. അനധികൃതമായി താലൂക്ക് ഓഫിസ് വളപ്പില്‍ നിര്‍ത്തിയിടുന്ന വാഹനങ്ങളുടെ ഉടമകള്‍ക്കെതിരേ പൊലിസിന്റെ സഹായത്തോടെ പിഴയുള്‍പ്പെടെയുള്ള നടപടികള്‍ സ്വീകരിക്കും.
താലൂക്ക് ഓഫിസ് മിനി സിവില്‍സ്റ്റേഷന്‍ പരിസരത്തെ എല്ലാ ബോര്‍ഡുകളും നീക്കം ചെയ്യും. സര്‍വിസ് സംഘടനകള്‍ സ്ഥാപിച്ച ബോര്‍ഡുകള്‍ നീക്കം ചെയ്യാന്‍ നോട്ടിസ് നല്‍കാനും യോഗം തീരുമാനിച്ചു.