ആലക്കോട്: ക്ഷീരോത്പാദക സഹകരണ സംഘത്തിലെ രേഖകള്‍ ദുരൂഹ സാഹചര്യത്തില്‍ കത്തിനശിച്ച നിലയില്‍ കണ്ടെത്തി. കഴിഞ്ഞ ദിവസം തെരഞ്ഞെടുപ്പ് നടന്ന കാര്‍ത്തികപുരം സംഘത്തിലെ രസീതുകള്‍ ഉള്‍പ്പെടെയുള്ള രേഖകളാണ് കത്തിനശിച്ചത്.
കാര്‍ത്തികപുരം കേന്ദ്രമാക്കി പ്രവര്‍ത്തിക്കുന്ന ക്ഷീരസംഘത്തില്‍ ഇടക്കാലത്ത് യു.ഡി.എഫ് സര്‍ക്കാര്‍ നിയമിച്ച അഡ്മിനിസ്‌ട്രേറ്റിവ് കമ്മറ്റിയാണ് ഭരണം നടത്തിയിരുന്നത്. എന്നാല്‍ കഴിഞ്ഞ ദിവസം തെരഞ്ഞെടുപ്പില്‍ യു.ഡി.എഫ്-ബി.ജെ.പി സഖ്യത്തെ പരാജയപ്പെടുത്തി ഇടതുമുന്നണി വിജയിക്കുകയായിരുന്നു.
ഹൈകോടതിയുടെ പ്രത്യേക ഉത്തരവ് പ്രകാരം യു.ഡി.എഫിലെയും ബി.ജെ.പിയിലെയും 13 മെമ്പര്‍മാര്‍ ഈ തെരഞ്ഞെടുപ്പില്‍ വോട്ട് ചെയ്തിരുന്നു.
എല്‍.ഡിഎഫ് വിജയിച്ചതോടെ അനുബന്ധ രേഖകള്‍ കോടതിയില്‍ ഹാജരാക്കാതിരിക്കാനാണ് സെക്രട്ടറിയുടെ നേതൃത്വത്തില്‍ രേഖകള്‍ കത്തിച്ചതെന്നാണ് ഇടത് ആരോപണം. ഉപയോഗശൂന്യമായ കടലാസുകള്‍ മാത്രമാണ് കത്തിച്ചതെന്ന വിശദീകരണവുമായി സെക്രട്ടറിയും രംഗത്തെത്തി. പാതി കത്തിയ രേഖകള്‍ സംഘം ഓഫിസിനു മുന്നിലെ ഓവുചാലില്‍ കണ്ടതോടെ നാട്ടുകാര്‍ പൊലിസില്‍ അറിയിക്കുകയായിരുന്നു. ആലക്കോട് പൊലിസ് സ്ഥലത്തെത്തി അന്വേഷണം തുടങ്ങി