മൊഗ്രാല്‍പുത്തൂര്‍: വീട്ടുമുറ്റത്തു നിര്‍ത്തിയിട്ട കാര്‍ കത്തിച്ച കേസില്‍ മൂന്നു പേരെ കാസര്‍കോട് പൊലിസ് അറസ്റ്റ് ചെയ്തു. പേരാല്‍ കൊട്ടോരി മടവൂര്‍ മന്‍സിലിലെ അബ്ദുല്‍ സലാം എന്ന സലാം (23), കുമ്പള നായിക്കാപ്പ് സൂരംബയലില്‍ താമസിക്കുന്ന മുഹമ്മദ് നൗഷാദ് (22), ബന്തിയോട് താമസിക്കുന്ന അസീര്‍ എന്ന സദ്ദു(23) എന്നിവരെയാണ് സി.ഐ അബ്ദുല്‍ റഹീമിന്റെ നേതൃത്വത്തിലുള്ള സംഘം ഇന്നലെ ഉച്ചയോടെ പിടികൂടിയത്. ഗുണ്ടാപ്പണം നല്‍കാത്തതിലുള്ള വൈരാഗ്യമാണു കാര്‍ കത്തിക്കുന്നതിലേക്കുനയിച്ചതെന്നു അന്വേഷണത്തില്‍ തെളിഞ്ഞതായി പൊലിസ് പറഞ്ഞു.
മൊഗ്രാല്‍പുത്തൂര്‍ ഗവ. ഹയര്‍സെക്കന്‍ഡറി സ്‌കൂള്‍ റോഡിലെ മുഹമ്മദിന്റെ ഭാര്യ ജമീലയുടെ ഉടമസ്ഥതയിലുള്ള ഇന്നോവ കാറാണു നവംബര്‍ 25നു പുലര്‍ച്ചെ കത്തിച്ചത്. ജമീലയുടെ മക്കളായ അലി ആഷിഫും ആരിഫുമായിരുന്നു കാര്‍ ഉപയോഗിച്ചിരുന്നത്. ഹെല്‍മെറ്റ് ധരിച്ച രണ്ടു പേര്‍ കാറിനു നേരെ ഇന്ധനമൊഴിക്കുന്നതും തീ കൊളുത്തുന്നതും വീട്ടിലെ സി.സി ടി.വിയില്‍ പതിഞ്ഞിരുന്നു. ഇത് അടിസ്ഥാനമാക്കിയാണ് പൊലിസ് അന്വേഷണം നടത്തിയത്.
അതിനിടെ സംഘം വീട്ടുകാരെ ഫോണില്‍ വിളിച്ചു പണം ആവശ്യപ്പെട്ടു ഭീഷണിപ്പെടുത്തിയിരുന്നു. 2014 ല്‍ പേരാലിലെ യുവാവിനെ കൊലപ്പെടുത്തി മണലില്‍ കുഴിച്ചുമൂടിയ കേസിലെ പ്രതികളാണ് മൂവരുമെന്ന് പൊലിസ് പറഞ്ഞു.