കോഴിക്കോട്: സംസ്ഥാന, ജില്ലാ ദുരന്ത നിവാരണ അതോറിറ്റികളുടെ സംയുക്ത സംരംഭമായ സ്റ്റുഡന്റ്‌സ് റാപ്പിഡ് റെസ്‌പോണ്‍സ് ഫോഴ്‌സ് (എസ്.ആര്‍.ആര്‍.എഫ്) ആദ്യമായി നിലവില്‍ വന്നു. പദ്ധതിയുടെ പൈലറ്റ് പ്രോജക്ടായി കോടഞ്ചേരി ഗവ.കോളജിലെ വിദ്യാര്‍ഥികളെ ഉള്‍ക്കൊള്ളിച്ചുള്ള ഫോഴ്‌സിന്റെ ഉദ്ഘാടനം കലക്ടറേറ്റ് കോണ്‍ഫറന്‍സ് ഹാളില്‍ മന്ത്രി ഇ. ചന്ദ്രശേഖരന്‍ നിര്‍വഹിച്ചു.
എസ്.ആര്‍.ആര്‍.എഫ് വ്യാപിപ്പിക്കുന്നത് സംബന്ധിച്ച് ഉന്നതതലത്തില്‍ ഗൗരവതരമായി ആലോചിച്ച് തീരുമാനമെടുക്കുമെന്ന് മന്ത്രി അറിയിച്ചു. ലോഗോ റവന്യൂ മന്ത്രിക്ക് നല്‍കി ഗതാഗത മന്ത്രി എ.കെ. ശശീന്ദ്രന്‍ പ്രകാശനം ചെയ്തു. മാനസികാരോഗ്യ പ്രവര്‍ത്തകര്‍ക്കുള്ള തിരിച്ചറിയല്‍ കാര്‍ഡ് വിതരണം എം.എല്‍.എമാരായ സി.കെ. നാണു, പുരുഷന്‍ കടലുണ്ടി എന്നിവര്‍ നിര്‍വഹിച്ചു.
മേയര്‍ തോട്ടത്തില്‍ രവീന്ദ്രന്‍ അധ്യക്ഷത വഹിച്ചു. കോടഞ്ചേരി ഗവ. കോളജ് പ്രിന്‍സിപ്പല്‍ ഡോ.സി.കൃഷ്ണന്‍, ഡോ.ഷഹീദ് റംസാന്‍ സി.പി, അസി. ഡിവിഷനല്‍ ഫയര്‍ ഓഫിസര്‍ അരുണ്‍ ഭാസ്‌കര്‍ സംസാരിച്ചു.
ദുരന്തനിവാരണ മേഖലയില്‍ വിദ്യാര്‍ഥികളെ ഉള്‍ക്കൊള്ളിച്ച ആദ്യസംരംഭമാണിത്. വിദ്യാര്‍ഥികളെയും യുവജനങ്ങളെയും പ്രാദേശിക ജനങ്ങളെയും ദുരന്തനിവാരണ പ്രവര്‍ത്തനങ്ങള്‍ക്ക് സജ്ജമാക്കുകയാണിതിന്റെ പ്രധാന ലക്ഷ്യം.
ദുരന്തഭൂമിയില്‍ ആദ്യം എത്തുന്നതും നടപടി എടുക്കുന്നതും ഇവരായിരിക്കും.