പാനൂര്‍: കുറ്റേരി രക്തസാക്ഷി അരിക്കല്‍ അശോകനെ കൊലപ്പെടുത്തിയ കേസില്‍ ശിക്ഷിക്കപ്പെട്ട് പരോളില്‍ ഇറങ്ങിയ ഒന്‍പതാം പ്രതിക്ക് ആത്മഹത്യാശ്രമത്തിനിടെ കിണറ്റില്‍ വീണു ഗുരുതര പരുക്ക്. പാനൂര്‍ കൂറ്റേരിയിലെ ആര്‍.എസ്.എസ് പ്രവര്‍ത്തകനായ മുള്ളന്‍ കുന്നുമ്മല്‍ ഉത്തമ(47)നാണ് പരുക്കേറ്റത്. ആത്മഹത്യാശ്രമത്തിനിടെ കയര്‍പൊട്ടി കിണറ്റില്‍ വീഴുകയായിരുന്നു. പാനൂരില്‍ നിന്നെത്തിയ ഫയര്‍ഫോഴ്‌സ് സംഘമാണ് ഇയാളെ കിണറ്റില്‍ നിന്നു രക്ഷിച്ചത്. ഏതാനും വര്‍ഷങ്ങളായി ചീമേനി തുറന്ന ജയിലില്‍ ശിക്ഷ അനുഭവിച്ചു വരികയായിരുന്നു. കഴിഞ്ഞ ഒന്‍പതിനാണ് പരോളില്‍ ഇയാള്‍ നാട്ടിലെത്തിയത്. ഉത്തമനെ തലശേരി സഹകരണാശുപത്രിയില്‍ അത്യാഹിത വിഭാഗത്തില്‍ പ്രവേശിപ്പിച്ചിരിക്കുകയാണ്.