ആലപ്പുഴ: ജി.എസ്.ടി നടപ്പിലാക്കുന്നതിന്റെ ഭാഗമായി നിലവിലുള്ള രജിസ്റ്റേര്‍ഡ് വ്യാപാരികള്‍ക്കുള്ള സംശയ ദൂരീകരണത്തിനായി സഹായകേന്ദ്രം തുടങ്ങുന്നു.
ജി.എസ്.ടി.യിലേക്ക് രജിസ്‌ട്രേഷന്‍ മാറ്റുന്നതുമായി ബന്ധപ്പെട്ട് വ്യാപാരികള്‍, പ്രാക്ടീഷണര്‍മാര്‍ മുതലായവര്‍ക്കുള്ള സംശയങ്ങള്‍ക്ക് മറുപടി നല്‍കുന്നതിനായി ഡിസംബര്‍ 26 മുതല്‍ ജനുവരി 15 വരെയാണ് സഹായ കേന്ദ്രം. വഴിച്ചേരി രാമചന്ദ്ര കോംപ്ലക്‌സില്‍ പ്രവര്‍ത്തിക്കുന്ന വാണിജ്യ നികുതി ഡെപ്യൂട്ടി കമ്മീഷണര്‍ ഓഫീസില്‍ രാവിലെ എട്ടു മുതല്‍ രാത്രി 10 വരെ ഹെല്‍പ് ഡെസ്‌ക് പ്രവര്‍ത്തിക്കും. ഡിജിറ്റല്‍ സിഗനേച്ചര്‍ നിലവില്‍ ഇല്ലാത്ത രജിസ്‌ട്രേഡ് വ്യാപാരികള്‍ ഈ മാസം 26, 27, 28 തീയതികളില്‍ ഡിജിറ്റല്‍ സിഗനേച്ചര്‍ എടുക്കുന്നതിനായി അതത് വാണിജ്യ നികുതി ഓഫീസുകളുമായി ബന്ധപ്പെടണം.  നിലവില്‍ ഡിജിറ്റല്‍ സിഗനേച്ചര്‍ ഉള്ളവര്‍ അത് പുതുക്കണമെന്നും വാണിജ്യ നികുതി ഡെപ്യൂട്ടി കമ്മിഷണര്‍ അറിയിച്ചു. കൂടുതല്‍ വിവരത്തിന്  ഫോണ്‍: 0477-2243252 എന്ന നമ്പരില്‍ വിളിക്കുക.