പെരിയ: കേന്ദ്ര സര്‍വ കലാശാലക്ക് മുന്നില്‍ പട്ടിണി സമരം നടത്തുന്ന പെരിയ മാളോത്തുംപാറ കോളനി നിവാസികള്‍ക്ക് ഐക്യദാര്‍ഢ്യം പ്രഖ്യാപിച്ച് യൂത്ത് കോണ്‍ഗ്രസ് ഉദുമ മണ്ഡലം കമ്മിറ്റി നേതൃത്വത്തില്‍ ശയന സമരം നടത്തി. കേന്ദ്ര സര്‍വകലാശാലയുടെ ആസ്ഥാനമായ പെരിയ തേജസ്വിനി ഹില്ലിനു മുന്നിലായിരുന്നു സമരം. ഡി.സി.സി.പ്രസിഡന്റ് ഹഖീം കുന്നില്‍, സാജിദ് മവ്വല്‍, സി.കെ അരവിന്ദാക്ഷന്‍,ശ്രീകല, വിനോദ് കുമാര്‍ പള്ളയില്‍ വീട്, ഷിജിത്ത് മാടക്കാല്‍ തുടങ്ങിയവര്‍ നേതൃത്വം നല്‍കി.
കേന്ദ്ര സര്‍വകലാശാലക്കു വേണ്ടി തങ്ങളുടെ സ്ഥലവും വീടും ഉള്‍പ്പെടെയുള്ളവ വിട്ടു നല്‍കുമ്പോള്‍ ഒരു കുടുംബത്തിലെ ഒരാള്‍ക്ക് യോഗ്യതക്കനുസരിച്ച് സര്‍വകലാശാലയില്‍ ജോലി നല്‍കുമെന്ന അധികൃതരുടെ വാഗ്ദാനം പാലിക്കണമെന്ന ആവശ്യം ഉന്നയിച്ചാണ് പട്ടിണി സമരം നടത്തുന്നത്. രണ്ടു വീതം ആളുകള്‍ നടത്തുന്ന സമരം 25 ദിനം പിന്നിട്ടതോടെ കോളനിയിലെ സ്ത്രീകളാണ് ഇപ്പോള്‍ സമരരംഗത്തുള്ളത്.
അധികൃതര്‍ നല്‍കിയ വാഗ്ദാനം പാലിക്കണമെന്ന ആവശ്യം ഉന്നയിച്ച് പട്ടിണി സമരം നടത്തുന്നതിന് മുമ്പ് രണ്ടു തവണ ഇവര്‍ ആത്മഹത്യാ ഭീഷണി മുഴക്കിയിരുന്നു. സര്‍വകലാശാല ഹോസ്റ്റല്‍ കെട്ടിടത്തിന് മുകളില്‍ കയറിയാണ് കോളനിയിലെ 14 ഓളം യുവാക്കള്‍ അന്ന് ഭീഷണി മുഴക്കിയത്.
അധികൃതരെ മുള്‍മുനയില്‍ നിര്‍ത്തി മണിക്കൂറോളം ഭീഷണിയുമായി നില കൊണ്ട യുവാക്കളെ ജില്ലാ കലക്ടര്‍,ആര്‍.ഡി.ഒ എന്നിവരുള്‍പ്പെടെയുള്ളവര്‍ അനുനയിപ്പിക്കുകയും ഇവരുടെ ആവശ്യങ്ങള്‍ അനുഭാവ പൂര്‍വം പരിഗണിക്കുകയും ചെയ്യുമെന്ന് ഉറപ്പു നല്‍കിയിരുന്നെങ്കിലും ഇത് പരിഹരിക്കാതെ വന്നതോടെയാണ് കോളനി നിവാസികള്‍ പട്ടിണി സമരവുമായി രംഗത്തിറങ്ങിയത്.
ഇന്നലേക്ക് പട്ടിണി സമരം 46 ദിവസം പിന്നിട്ടെങ്കിലും അധികൃതര്‍ക്ക് യാഥരു കുലുക്കവുമില്ല.