ന്യൂഡല്‍ഹി: ഓഹരി വിപണിയില്‍ ഇടപാടുകള്‍ക്ക് അധികനികുതി ചുമത്തുമെന്ന വാര്‍ത്ത കേന്ദ്ര ധനകാര്യ മന്ത്രി അരുണ്‍ ജെയ്റ്റ്‌ലി തള്ളി.  ഓഹരി വിപണിയില്‍ നിന്ന് ദീര്‍ഘകാലത്തേക്ക് ലഭിക്കുന്ന വരുമാനത്തിന് നികുതി ചുമത്തുമെന്നുള്ള വാര്‍ത്തകളോടു പ്രതികരിക്കുകയായിരുന്നു മന്ത്രി.
ഓഹരി വിപണിയില്‍ ഇടപാടുകള്‍ നടത്തുന്നവരും നല്ല രീതിയില്‍ നികുതി നല്‍കി രാഷ്ട്രനിര്‍മാണത്തില്‍ പങ്കാളികളാവണമെന്ന പ്രധാനമന്ത്രിയുടെ ആവശ്യത്തിന്റെ പശ്ചാത്തലത്തിലാണ് ഓഹരി വിപണിയിലെ ഇടപാടുകള്‍ക്ക് സര്‍ക്കാര്‍ അധികനികുതി ചുമത്തുമെന്ന രീതിയിലുള്ള വാര്‍ത്തകള്‍ പുറത്തു വന്നത്.
ഇതിനെ തുടര്‍ന്നാണ് ധനമന്ത്രി നിലപാട് വ്യക്തമാക്കിയത്. പ്രധാനമന്ത്രിയുടെ പ്രസ്താവന മാധ്യമങ്ങള്‍ തെറ്റായി റിപ്പോര്‍ട്ട് ചെയ്യുകയായിരുന്നുവെന്ന് ജെയ്റ്റ്‌ലി പറഞ്ഞു.
ഓഹരി വിപണിയിലെ നിക്ഷേപങ്ങളില്‍ നിന്ന് ദീര്‍ഘകാലത്തേക്ക് ലഭിക്കുന്ന വരുമാനത്തിന് നിലവില്‍  നികുതി ഇളവുകളുണ്ട്. ഓഹരികള്‍ ഒരു വര്‍ഷത്തില്‍ കൂടുതല്‍ കൈവശം വച്ച് വില്‍ക്കുമ്പോഴാണ് നികുതി ഇളവ് നല്‍കുന്നത്.
നിലവില്‍ ചെറിയ കാലയളവില്‍ ഓഹരികള്‍ കൈവശം വച്ച് വില്‍ക്കുമ്പോള്‍ 15 ശതമാനം നികുതി നല്‍കേണ്ടതുണ്ട്. ഇത്തരത്തില്‍ കൂടുതല്‍ കാലം ഓഹരികള്‍ കൈവശം വച്ച് വില്‍ക്കുമ്പോഴും നികുതി നല്‍കേണ്ടി വരുമെന്ന പ്രചാരണമാണ് നടന്നിരുന്നത്.