പൂച്ചാക്കല്‍:അരൂക്കുറ്റി പാതുവാപുരംപള്ളി തോട്ടില്‍ മാലിന്യം നിറഞ്ഞതോടെ നാട്ടുകാര്‍ ആശങ്കയിലായി.അരൂക്കുറ്റി ഗ്രാമപഞ്ചായത്തിലെ കൈതപ്പുഴ കായലിലേക്കുള്ള പാതുവാപുരം പള്ളി തോടാണ് മാലിന്യം നിറയുന്നത്.
ദുര്‍ഗന്ധവും രോഗഭീഷണിയുമായിട്ടും വൃത്തിയാക്കാന്‍ ബന്ധപ്പെട്ടവര്‍ നടപടി സ്വീകരിക്കാത്തതില്‍ നാട്ടുകാര്‍ പ്രതിഷേധം ഉയര്‍ന്നിട്ടുണ്ട്. . മല്‍സ്യമാംസ അവശിഷ്ടങ്ങള്‍, അറവ് മാലിന്യങ്ങള്‍, കക്കൂസ് മാലിന്യങ്ങള്‍ തുടങ്ങിയവ ഈ തോട്ടിലാണ് നിക്ഷേപിക്കുന്നത്. രാത്രികാലങ്ങളില്‍ മറ്റ് സ്ഥലങ്ങളില്‍ നിന്നും മാലിന്യങ്ങള്‍ വാഹനത്തില്‍ കൊണ്ടു വന്നിടുന്നതും പതിവാണ്.മാലിന്യം മൂലമുള്ള രൂക്ഷമായ ദുര്‍ഗന്ധവും ഈച്ചകളും കൊതുകുകളും പുഴുക്കളും പെരുകുന്നതും രോഗഭീഷണിക്ക് കാരണമാകുന്നു.
ദുര്‍ഗന്ധം സഹിക്കാനാവാതെ പ്രദേശവാസികള്‍ വീര്‍പ്പ് മുട്ടുകയാണ്. മാലിന്യം കുന്നുകൂടി തോടിന്റെ നീരൊഴുക്ക് തടസപ്പെട്ടിരിക്കുകയാണ്.തീര്‍ത്ഥാടന കേന്ദ്രമായ പാതുവാപുരം ചര്‍ച്ചും തോടിന്റെ ഇരുകരകളിലായി ധാരാളം കുടുംബങ്ങളുമാണ് താമസിക്കുന്നത്. ഇവരില്‍ പലര്‍ക്കും ഛര്‍ദി ഉള്‍പ്പെടെയുള്ള അസുഖങ്ങളും തൊലിപ്പുറമെയുള്ള അസുഖങ്ങളും കണ്ടു തുടങ്ങി.വീടുകളിലെ കുടിവെള്ള സോത്രസുകളും മലിനമാകുകയാണ്.തോടിന്റെ അവസ്ഥ സംബന്ധിച്ച് നാട്ടുകാര്‍ ഒട്ടേറെ പരാതികള്‍ ആരോഗ്യവകുപ്പ് അധികൃതര്‍ക്ക് നല്‍കിയിട്ടും യാതൊരു നടപടിയും സ്വീകരിക്കുന്നില്ലെന്ന് നാട്ടുകാര്‍ പറയുന്നു.
തോട് വൃത്തിയാക്കുന്നതിന് ആവശ്യമായ നടപടികള്‍ ഉടന്‍ സ്വീകരിച്ചില്ലെങ്കില്‍ ശക്തമായ സമരപരിപാടിയുമായി മുന്നോട്ട് പോകുമെന്ന് പ്രദേശവാസികള്‍ പറഞ്ഞു.