കോഴിക്കോട്: നോട്ട് അസാധുവാക്കലുമായി ബന്ധപ്പെട്ട് ജനങ്ങളുടെ ദുരിതചിത്രം എടുത്തുപറഞ്ഞ ജ്ഞാനപീഠം ജേതാവ് എം.ടി വാസുദേവന്‍ നായരെ അധിക്ഷേപിക്കുന്നതിലൂടെ ബി.ജെ.പി അവരുടെ അസഹിഷ്ണുതയും ഫാസിസ്റ്റ് മുഖവുമാണ് വെളിവാക്കുന്നതെന്ന് ഡി.സി.സി പ്രസിഡന്റ് അഡ്വ. ടി സിദ്ദീഖ്.
എം.ടി പറഞ്ഞത് അദ്ദേഹത്തിന്റെ അനുഭവം മാത്രമല്ല, ഇവിടെയുള്ള സാധാരണക്കാരുടെ അനുഭവവും ബി.ജെ.പിക്കാര്‍ ഉള്‍പ്പെടെ രഹസ്യമായി സമ്മതിക്കുന്ന വസ്തുതയുമാണ്. അത് തുറന്നുപറയാന്‍ എം.ടി കാണിച്ച ധൈര്യം സത്യസന്ധതയുടേതാണ്. ആ സമീപനത്തെ ഭയപ്പെടുത്തി നാവടപ്പിക്കാമെന്നാണ് ബി.ജെ.പി നേതൃത്വത്തിന്റെ ചിന്തയെങ്കില്‍ കേരളത്തില്‍ വിലപ്പോകില്ലെന്നും സിദ്ദീഖ് കൂട്ടിച്ചേര്‍ത്തു.