അങ്കമാലി: ഭക്ഷ്യവിഷബാധയേറ്റ് തുറവൂര്‍ സര്‍ക്കാര്‍ ആശുപത്രിയില്‍ ചികിത്സ തേടിയെത്തിയ വിദ്യാര്‍ഥിനിയോട് ചികിത്സ നല്‍ക്കുന്നതിന് ഡോക്ടര്‍ കൈക്കുലി ചോദിച്ചതില്‍ പ്രതിഷേധിച്ച് ഡോക്ടറെ ഉപരോധിച്ചു. തുറവൂര്‍ ഗ്രാമപഞ്ചായത്ത് പ്രസിഡന്റ് കെ.വൈ വര്‍ഗീസിന്റെ നേതൃത്തില്‍ നടന്ന ഉപരോധസമരത്തില്‍ പഞ്ചായത്ത് അംഗങ്ങള്‍ ഉള്‍പ്പടെയുള്ളവര്‍ പങ്കെടുത്തു. ക്രിസ്മസ് അവധിക്ക് കളമശേരിയിലെ ഒരു കോളജിലെ എന്‍.സി.സി പ്രവര്‍ത്തകര്‍ തുറവൂര്‍ പഞ്ചായത്തില്‍ ക്യാംപ് സംഘടിപ്പിച്ചിരുന്നു.
ഈ ക്യാംപിലെ വിദ്യാര്‍ഥിയെയാണ് വ്യാഴാഴ്ച്ച രാത്രി ഭക്ഷ്യ വിഷബാധയെ തുടര്‍ന്ന് ആശുപത്രിയില്‍ എത്തിച്ചത്. ഈ സമയം ഡ്യൂട്ടിയല്ലാതിരുന്ന ഡോക്ടര്‍ ജോസഫ് ചികിത്സക്ക് പണം ചോദിക്കുകയായിരുന്നു. തുടര്‍ന്ന് പണം നല്‍കിയ ശേഷമാണ് ഇയാള്‍ ചികിത്സ നല്‍കിയത്.
ഇത് അറിഞ്ഞ തുറവൂര്‍ പഞ്ചായത്ത് പ്രസിഡന്റ് കെ.വൈ വര്‍ഗീസ് അടക്കമുള്ളവര്‍ ഇന്നലെ രാവിലെ ആശുപത്രിയില്‍ എത്തിയ ഡോക്ടറെ ഉപരോധിക്കുകയായിരുന്നു. തുടര്‍ന്ന് അസിസന്റ് ഡി.എം.ഒ സ്ഥലത്ത് എത്തി ഡോക്ടര്‍ക്കെതിരെ നടപടിയെടുക്കാമെന്ന് ഉറപ്പ് നല്‍കി. ഇതിനെ തുടര്‍ന്ന് ഉപരോധസമരം പിന്‍വലിച്ചു.