കൊച്ചി: യുവ വ്യവസായി സാന്ദ്രാ തോമസിന്റെ പരാതിയിന്മേലുള്ള പൊലിസ് കേസ് കെട്ടിച്ചമച്ചതെന്ന ആരോപണവുമായി പ്രതിയാക്കപ്പെട്ടവര്‍. സാന്ദ്രാ തോമസുമായുള്ള സ്ഥലമിടപാടില്‍ കബളിപ്പിക്കപ്പെട്ടത് തങ്ങളാണെന്ന് പ്രതികളാക്കപ്പെട്ട കമാലുദ്ദീനും ഭാര്യ സജിനയും വാര്‍ത്താ സമ്മേളനത്തില്‍ പറഞ്ഞു.
ഇടപ്പള്ളി പോണക്കരയില്‍ അഞ്ച് സെന്റ് ഭൂമിയും മൂന്ന് നിലകളിലുള്ള കെട്ടിടവും 1.75 കോടി രൂപയ്ക്ക് വാങ്ങാമെന്ന് സാന്ദ്രാ തോമസും ഭര്‍ത്താവും വാക്കുനല്‍കുകയായിരുന്നു. ബാങ്ക് വായ്പയായി എടുക്കുന്ന തുക സ്ഥലമിടപാടിനായി നല്‍കാം എന്ന സാന്ദ്രാ തോമസിന്റെ വാഗ്ദാനത്തിലായിരുന്നു കാരാര്‍ എഴുതിയത്. കരാര്‍ തിയതി മുതല്‍ 15 ദിവസത്തിനകം തുക നല്‍കാമെന്ന് സാന്ദ്രാ തോമസ് സമ്മതിച്ചിരുന്നു.
കരാറിലെ വ്യവസ്ഥകള്‍ പാലിച്ച് പണം നല്‍കാതിരുന്നതിനാല്‍ സെപ്റ്റംബര്‍ 22 വരെ കരാര്‍ കാലാവധി നീട്ടുകയും ചെയ്തിരുന്നു. എന്നാല്‍ സാന്ദ്രാ തോമസിന്റെ പെരുമാറ്റത്തില്‍ സംശയം തോന്നിയതിനെ തുടര്‍ന്ന് ഇടപാടുകള്‍ ഉടന്‍ അവസാനിപ്പിക്കണമെന്ന് കമാലുദ്ദീന്‍ ആവശ്യപ്പെട്ടു. ഇരുപതിന് പണം നല്‍കാമെന്ന് പറഞ്ഞുവെങ്കിലും 18 ന് സാന്ദ്രാ തോമസ് തങ്ങള്‍ക്കെതിരെ പരാതി നല്‍കുകയായിരുന്നുവെന്നും കമാലുദ്ദീന്‍ പറഞ്ഞു. കേസില്‍ നിരപരാധികളായ തങ്ങളെ മാനസികമായി ബുദ്ധിമുട്ടിച്ചു എന്നാരോപിച്ച് ഇവര്‍ പൊലിസ് കംപ്ലയിന്റ് അഥോറിറ്റിക്ക് പരാതി നല്‍കിയിട്ടുണ്ട്.