മലപ്പുറം: ജില്ലയിലെ നദീ പരിപാലന ഫണ്ട് വക മാറ്റി ചെലവഴിച്ചതിനെതിരേ ജില്ലാ പഞ്ചായത്ത് യോഗത്തില്‍ പ്രതിഷേധം. ജില്ലയില്‍ വരള്‍ച്ച ശക്തമായിട്ടും ഇത് പരിഹരിക്കാനുള്ള നടപടികള്‍ സ്വീകരിക്കുന്നതിന് പകരം ഫണ്ട് വകമാറ്റുന്നതിരെയാണ് ജില്ലാ പഞ്ചായത്ത് യോഗത്തില്‍ പ്രതിഷേധമുയര്‍ന്നത്. ജില്ലക്ക് അനുവദിച്ച ഫണ്ടില്‍ നിന്നും 25 ലക്ഷം രൂപയാണ് ദുരന്തനിവാരണ വിഭാഗം വാഹനങ്ങള്‍ വാങ്ങാന്‍ ചെലവഴിച്ചത്. മുമ്പ് റവന്യൂ പ്രിന്‍സിപ്പല്‍ സെക്രട്ടറിയുടെ നിര്‍ദേശ പ്രകാരം ജില്ലയിലെ 20 കോടി രൂപ പത്തനംതിട്ട ജില്ലാ കലക്ടര്‍ക്കും കൈമാറിയിരുന്നു. പുഴകളിലെ മണല്‍ വിറ്റ് സ്വരൂപിക്കുന്ന റിവര്‍ മാനേജ്‌മെന്റ് ഫണ്ട് അതേ ജില്ലകളിലെ പുഴകളെ പ്രകൃതിദത്തമായി സംരക്ഷിക്കുന്നതിന് ഉപയോഗിക്കണമെന്നും മറ്റു ആവശ്യങ്ങള്‍ക്ക് ഉപയോഗിക്കരുതെന്നും ചട്ടമുണ്ടായിരിക്കേയാണ് ഈ വകമാറ്റല്‍. ജില്ലാ പഞ്ചായത്ത് അംഗം ടി.പി അഷ്‌റഫലിയാണ് വിഷയം ഗൗരമായെടുക്കണമെന്ന് ജില്ലാ പഞ്ചായത്ത് ഭരണ സമിതി യോഗത്തില്‍ ആവശ്യപ്പെട്ടത്. സംഭവം അന്വേഷിക്കാന്‍ റവന്യൂ ഡിപ്പാര്‍ട്ട്‌മെന്റിനോട് ആവശ്യപ്പെടുമെന്ന് ജില്ലാ പഞ്ചായത്ത് പ്രസിഡന്റ് എ.പി ഉണ്ണികൃഷ്ണന്‍ അറിയിച്ചു.