മാനന്തവാടി: തിരുനെല്ലി ഗ്രാമപഞ്ചായത്തിലെ ബാവലി, ഷാണമംഗലം, തോണിക്കടവ് പ്രദേശങ്ങളില്‍ കഴിഞ്ഞ രണ്ട് മാസത്തിനിടെ ഉണ്ടായ വന്യമൃഗശല്യത്തിന് ശാശ്വത പരിഹാരം കാണുക. റയില്‍ഫെന്‍സിങ് സ്ഥാപിക്കുക തുടങ്ങിയ അവിശ്യങ്ങളുന്നയിച്ച് വയനാട് വന്യമൃഗശല്യ പ്രതിരോധ കര്‍മ്മസമിതിയുടെ നേതൃത്വത്തില്‍ നോര്‍ത്ത് വയനാട് വനം ഡിവിഷന്‍ ഓഫിസിലേക്ക് ശവപ്പെട്ടിയേന്തി മാര്‍ച്ച് നടത്തി.
തുടര്‍ന്ന് ഉപരോധസമരവും നടത്തി. ബാവലി പ്രദേശത്ത് വിവിധ കാലഘട്ടങ്ങളില്‍ വന്യമൃഗ ആക്രമണത്തില്‍ മരിച്ച എട്ടു പേരുടെ സ്മരണാര്‍ത്ഥം ശവപ്പെട്ടിയുമായാണ് ബാവലിയില്‍ നിന്നും സമരക്കാര്‍ മാനന്തവാടിയില്‍ എത്തിയത്. തുടര്‍ന്ന് നഗരം ചുറ്റിയ പ്രകടനം ഡി.എഫ്.ഒ ഓഫിസില്‍ അവസാനിപ്പിച്ചു. തുടര്‍ന്ന് നടത്തിയ സമരം ജില്ലാ പഞ്ചായത്തംഗം എ.എന്‍ പ്രഭാകരന്‍ ഉദ്ഘാടനം ചെയ്തു. വാര്‍ഡംഗം വല്‍സലകുമാരി അധ്യക്ഷയായി. പ്രതിരോധ സമിതി ചെയര്‍മാന്‍ ടി.സി ജോസഫ്, നേതാക്കളായ പി.വി സഹദേവന്‍, എന്‍.എം ആന്റണി, സി.കെ ശങ്കരന്‍, ഡാനിയേല്‍ ജോര്‍ജ്, സതീഷ് കുമാര്‍, വി.ആര്‍ ജയചന്ദ്രന്‍, എന്‍.ടി ഹാരിസ്, വി.പി വിനോദ് സംസാരിച്ചു. ആര്‍ സുകുമാരന്‍ സ്വാഗതവും പി.എം അബ്ദുള്‍ നാസര്‍ നന്ദിയും പറഞ്ഞു. തുടര്‍ന്ന് ഡി.എഫ്.ഒ നരേന്ദ്രനാഥ് വേളൂരിയുമായി നടത്തിയ ചര്‍ച്ചയില്‍ ഈാസം 25ന് കര്‍മ്മസമിതി ഭാരവാഹികള്‍, പഞ്ചായത്ത് ഭരണസമിതി അംഗങ്ങള്‍, കര്‍ഷക പ്രതിനിധികള്‍ എന്നിവരുടെ സംയുക്ത യോഗം ചേര്‍ന്ന് വന്യമൃഗശല്യം തടയാനുള്ള അടിയന്തര നടപടി സ്വീകരിക്കും. കടുവയുടെ ആക്രമണത്തില്‍ പരിക്കേറ്റ തോണിക്കടവ് തുറമ്പൂര്‍ കോളനിയിലെ സുധീഷിന്റെ കുടുംബത്തിലെ ഒരാള്‍ക്ക് താല്‍ക്കാലിക വാച്ചര്‍ ജോലി നല്‍കാനും തീരുമാനിച്ചതോടെയാണ് ഉപരോധസമരം അവസാനിച്ചത്.