പള്ളിക്കല്‍: ദേശീയപാത ചെട്ടിയാര്‍മാട് റോഡരികില്‍ മുറിച്ചിട്ട മരത്തടിയില്‍ ഇടക്കിടെ തീപടരുന്നത് പ്രദേശവാസികളെ ഭീതിയിലാക്കുന്നു.
മാസങ്ങള്‍ക്ക് മുന്‍പ് മുറിച്ച ഭീമന്‍ ആല്‍മരത്തിന്റെ വേരോടുകൂടിയ അടിഭാഗം റോഡരികില്‍ ഉപേക്ഷിച്ചു തടി മരം കരാറുകാര്‍ കൊണ്ടു പോവുകയായിരുന്നു. ഈ മരത്തടിയിലാണ് തീ പടരുന്നത്. വാഹനങ്ങള്‍ക്കും കാല്‍ നട യാത്രക്കാര്‍ക്കും ഏറെ പ്രയാസമുണ്ടാക്കി വഴിമുടക്കിയ മരം തീയിട്ടു നശിപ്പിക്കാന്‍ അജ്ഞാതര്‍ ശ്രമിച്ചതാകാമെന്നാണ് നിഗമനം.
നാല് ദിവസം മുന്‍പ് തീ ആളിപ്പടര്‍ന്നതിനാല്‍ അഗ്നിശമന സേനയെത്തിയാണ് തീയണച്ചത്. മരത്തിന്റെ ഉള്‍വശം തീ കെടാത്തതിനാല്‍ മരത്തിനുള്ളില്‍ നിന്നും തീ പുകയുന്നുണ്ടായിരുന്നു.
ഇന്നലെ വൈകുന്നേരത്തോടെ തീ വീണ്ടും ആളിപ്പടര്‍ന്നതോടെ മീഞ്ചന്തയില്‍ നിന്നും എസ്.ടി.ഒ അജിത് കുമാര്‍, എല്‍.എഫ് അനില്‍കുമാര്‍ എന്നിവരുടെ നേതൃത്വത്തില്‍ അഗ്നിശമന സേനയെത്തിയാണ് തീയണച്ചത്.
ഭിമന്‍ മരത്തിന്റെ ഉള്‍വശത്തെ തീ കെടുത്താന്‍ സാധിക്കാത്തതിനാല്‍ ഇനിയും കത്തിപ്പടരാന്‍ സാധ്യതയുണ്ടെന്നാണ് അഗ്നിശമന സേനാ ഉദ്യാഗസ്ഥര്‍ പറയുന്നത്. തൊട്ടടുത്ത് കടകളുള്ളതിനാല്‍ രാത്രി സമയങ്ങളില്‍ തീ പടര്‍ന്നാല്‍ വന്‍ അപകടം ഉണ്ടാകുമെന്ന ഭീതിയിലാണ് പ്രദേശവാസികള്‍.